Casnan ta haya colornan tipico Caribeño ta duna un aparencia mas bunita y acogedo na e entrada di San Nicolas

Revitalisacion di Bernhardstraat

ORANJESTAD (AAN): Prome Minister Mike Eman, hunto cu grupo di boluntario di Ministerio di Asunto General y miembro di comunidad, ta continua cu e proyecto di embeyecemento di Bernhardstraat na San Nicolas. Durante e actividad, dos cas situa na Bernhardstraat number 152 y 154 a haya capa di verf nobo como parti di e vision pa revitalisa e area y fortalece e aparencia di un di e entradanan principal den e discricto.

Eric Godet, kende ta biba na Bernhardstraat 154 y cu a pasa mas di 40 aña den e cas ey, a expresa su alegria cu su cas ta forma parti di e iniciativa di embeyecemento. Segun Godet, e proyecto lidera pa Prome Minister Mike Eman no solamente ta mehora e aparencia di caya, pero tambe ta fortifica e sentido di orguyo cerca e habitantenan di e bario.

"Mi ta hopi contento cu e iniciativa aki y cu nos cas ta forma parti di e vision pa Bernhardstraat. Despues di mas cu 40 aña biba aki, ta special pa mira cu nos caya ta hayando e atencion cu e merece. Ta bon pa mira cu hendenan ta trahando hunto pa mehora e aparencia di nos comunidad," Godet a bisa.

Un biaha mas, Purcy Wirht di Ba-We Construction & Cleaning, hunto cu varios miembro di su ekipo, a uni na e iniciativa pa brinda nan sosten y yuda cu e trabounan di verf. Nan participacion boluntario ta un ehempel cla di con colaboracion entre comunidad y sector priva ta contribui na e transformacion positivo di San Nicolas.

Te cu awo, 17 cas a registra pa forma parti di e proyecto. Cu cada Diasabra cu ta pasa, e cantidad di cas cu falta pa haya un facelift ta bira menos, y poco poco e proyecto ta acercando su meta final.

Prome Minister Mike Eman a expresa su satisfaccion cu e progreso cu ta logrando y cu e entusiasmo continuo di e boluntarionan.

“Nos ta hopi contento cu nos ta bolbe Bernhardstraat cada weekend. Danki na e dedicacion di tur e boluntarionan, nos ta mira con poco poco e vision pa Bernhardstraat ta bira realidad. E casnan ta haya colornan tipico Caribeño cu lo duna un aparencia mas bunita, colorido y acogedo na e entrada di San Nicolas.”

Segun Eman, e proyecto ta mucho mas cu solamente verf casnan. E ta forma parti di un vision mas amplio pa mehora e calidad di bida, fortalece e orguyo di comunidad y crea un ambiente mas agradabel pa habitantenan y bishitantenan.

“E ta un proyecto importante di restauracion y revitalisacion di Bernhardstraat. Nos kier mehora calidad di bida y na mes momento fortalece e sentido di responsabilidad comparti pa e bon comun. Cada paso cu nos ta tuma aki ta mustra cu comunidad ta dispuesto pa contribui activamente na mehoracion di su area.”

Eman a añadi cu e spirito comunitario cu ta surgi den diferente bario y organisacion na Aruba ta dun’e hopi speransa pa futuro.

“E yamada pa sirbi e bon comun ta haya oido den nos comunidad. Nos ta mira esey florece den bario, den scolnan y den diferente organisacion. E sosten cu nos ta ricibi ta mustra cu cada biaha mas hende ta kere den e importancia di traha hunto pa Aruba.”

E iniciativa ta sigui forma parti di e vision integral pa revitalisa Bernhardstraat y fortalece e imagen di San Nicolas como un comunidad vibrante, acogedo y yen di orguyo. Prome Minister Mike Eman a gradici tur boluntario, habitante y empresa cu ta contribui na e proyecto y a reafirma su compromiso pa sigui impulsa iniciativanan cu ta fortalece comunidad y mehora e calidad di bida na Aruba.