Peticion pa hiba e lucha pa defende nos autonomia na nivel internacional

Evelyn Wever-Croes den conferencia di COPPPAL:

ORANJESTAD (AAN): Riba Diaranson, 1 di juli 2026, lider di MEP, Evelyn Wever-Croes, a participa virtualmente den Reunion Plenaria di e Conferencia Permanente de Partidos Politicos di America Latina y Caribe (COPPPAL), cu a tuma lugar na Ciudad di Mexico.

   Aruba tabata representa fisicamente na e conferencia pa Joe Koolman. Pa motibo di obligacionnan di trabao, Wever-Croes no por a biaha pa Mexico, pero el a haci uso di e oportunidad pa dirigi e conferencia virtualmente.

   Den su discurso, Wever-Croes a pone enfasis riba e presion creciente cu Hulanda ta eherce riba autonomia di Aruba. El a recorda cu autonomia di Aruba no tabata un regalo, sino resultado di un lucha largo lidera door di Betico Croes, fundador di MEP, cu a conta cu apoyo internacional importante, entre otro di COPPPAL.

   Wever-Croes a bisa cu e principio di igualdad y autodeterminacion, manera cu ta stipula den Carta di Nacionnan Uni y den Statuut di Reino, mester sigui guia e relacion entre Aruba y Hulanda. El a expresa preocupacion cu, apesar cu Aruba a demostra cu por maneha su finanzas publico cu responsabilidad, Hulanda ta keda imponiendo condicionnan cu por resulta den menos autonomia financiero di Aruba y mas poder pa Hulanda.

   “E mensahe di Aruba ta cla,” Wever-Croes a declara. “Aruba no ta pidi privilegio. Aruba ta exigi respet: respet pa nos autonomia, respet pa derecho internacional y respet pa e capacidad cu nos pueblo a demostra pa goberna su propio pais.”

   Durante su discurso, Wever-Croes a haci un yamada na COPPPAL pa sostene Aruba den e lucha pa proteha su autonomia y pa yuda hiba e discusion aki na nivel internacional, entre otro den Nacionan Uni, CELAC, Parlatino y OEA.

   MEP ta hopi satisfecho cu COPPPAL a expresa su compromiso di sigui compaña Aruba den e proceso aki y di sigui defende e principio di decolonisacion y autodeterminacion di e pueblonan di nos region.

   MEP kier expresa un palabra special di agradecimento na Joe Koolman, cu a representa Aruba na Mexico y cu ta encabeza e Comision di Decolonisacion di COPPPAL. Su dedicacion y compromiso cu e causa di autonomia di Aruba ta di gran balor den e lucha cu nos ta sigui hiba, tanto nacional como internacional.