Ainda no a defini formula pa uza riba e mesa di Discusion Dialogo Social of Dialogo Nacional

Magaly Brito, Secretario General di SEPPA:

• Aunke a institui un Comision pero ainda no tin resultado concreto 

ORANJESTAD (AAN) Señora Magaly Brito, Secretario General di SEPPA (Sindicato di Empleadonan Publico y Priva Aruba), a wak cu a cuminza cu e  proceso di kico lo ta e formula cu nan lo bay trata riba e mesa di discusion, yama Dialogo Social of Dialogo Nacional. Asina el a relata den entrevista cu Matutino DIARIO.

   El a splica: “Pa esey a institui un comision cu mi por a compronde, tin diferente reunion andando, pero te ainda no tin resultado concreto of, alomenos, no definitivo. E idea di e comision ta, of lo tabata pa manda bisa den ki forma e structura ta, si nos ta bay den esun di ILO unda solamente ta papia di doñonan di trabao y trahadornan, y gobierno di Aruba, unda lo discuti y purba influencia posicion di otronan, p’asina yega na posibel solucionnan p’asina por tin un miho direccion of manera nan ta bisa tambe tin e discusion cu si kier involucra otro gruponan, pasobra e experticia, conocemento y habilidad di hopi otronan por ta importante y por aporta na e discusionnan. Pero e formula definitivo no a ser defini ainda y esey mi ta kere tin un poco discusionnan andando”, Magaly Brito a relata.

   Brito a subraya cu idea lo tabata pa prioriza cual ta e puntonan di mas importante, pa cuminza cu e dialogo aki. “Akinan tampoco nos no a ricibi informacion ainda cu tin un vision definitivo, cual ta e prome puntonan. Naturalmente, nos a tuma nota cu tin puntonan cu, tanto gremio sindical como e gremio di dunadornan di trabao y gobierno di Aruba, tin poni como puntonan di prioridad. Esey ta nifica cu e puntonan aki por bin riba mesa mas lihe posibel, pero te cu aworaki mi tin cu bisa cu e tema aki ta un poco pega, pa no bisa stanca, pero nos ta spera cu pronto e partidonan por sali for di otro, p’asina e discusionnan por cuminza na mesa real”, Magaly Brito a señala.