Wingo ta fortalece conectividad entre Aruba y Colombia cu ruta nobo pa Barranquilla

Director di Planeacion di Wingo, Carlos Meléndez:

ORANJESTAD (AAN): Durane un ceremonia special pa celebra e prome buelo directo entre Barranquilla y Aruba, Wingo a marca un momento historico pa conectividad aereo entre Aruba y Colombia. Durante su discurso, director di Planeacion di Wingo, Carlos Meléndez, a expresa su satisfaccion cu e expansion di e aerolinea y e colaboracion cu a haci esaki posibel. 

Meléndez a indica cu Wingo a haya un recibimento extraordinario na Aruba desde cu e aerolinea a cuminsa opera na e destino aki. Segun e, e calides di pueblo Arubiano, e ambiente dushi y e atraccion turistico di e isla ta e principal motibonan pakico e demanda pa e buelonan entre Aruba y Colombia a sigui crece constantemente. 

Cu e inauguracion di e ruta Barranquilla-Aruba, hunto cu e reciente lansamento di Bucaramanga-Aruba, Wingo ta bira e prome aerolinea cu ta conecta Aruba directamente cu cinco destino den Colombia: Bogotá, Medellín, Cali, Bucaramanga y Barranquilla. Segun Meléndez, nunca anteriormente un aerolinea tabata ofrece un nivel di conectividad asina entre e dos paisnan. 

E director a enfatisa cu e logro aki no ta solamente resultado di pone avionnan den aire, sino di un esfuerso conhunto entre Wingo, aeropuertonan, autoridadnan gubernamental di Colombia y Aruba, e Ministerio di Turismo y Transporte, y Aruba Airport Authority. El a gradici tur e entidadnan cu a contribui pa haci e proyecto realidad. 

E respuesta di mercado, segun Meléndez, ta confirma e exito di e rutanan nobo. E prome buelo inaugural di Barranquilla pa Aruba a yega cu 174 di e 186 asientonan disponibel, representando mas di 90% di ocupacion, mientras cu e buelo di regreso tabata casi yen, cu solamente cuatro asiento habri. 

Cu e dos rutanan nobo, Wingo lo tin capacidad pa transporta mas di 163.000 pasahero entre Aruba y Colombia cada aña. Ademas, e conexion directo cu Bucaramanga ta habri oportunidadnan nobo pa turismo, incluyendo turismo medico, danki na e programa Health Check-in y e reconocemento di Santander como un di e regionnan medico principal di Colombia. 

Wingo lo opera dos buelo semanal riba tanto e ruta Barranquilla-Aruba como Bucaramanga-Aruba, den orarionan matutino pa facilita cu pasaheronan por probecha nan dia completo na e destino. 

Meléndez a conclui reafirmando cu Wingo ta plenamente convenci cu e inversion den Aruba ta un decision corecto, cu lo beneficia tanto e aerolinea como economia di e isla. El a expresa cu Wingo ta compromete pa sigui fortalece e aliansa comercial cu Aruba y sigui amplia e conectividad entre ambos destino, invitando Arubianonan pa descubri e diversidad di Colombia, incluyendo Barranquilla, Bucaramanga, Medellín, Cali y Bogotá.