E Fondo di Inversion ta un agenda conciente pa pusha Rijkswet HOFA

Parlamentario Dangui Oduber:

ORANJESTAD (AAN): E ley di fondo di inversion cu a wordo trata recientemente den Parlamento di Aruba, ta lanta interogativo profundo tocante e forma con kier ehecuta e agenda pa pusha y forsa e implementacion di e Rijkswet HOfA.

   Ora analisa e contenido di e proposicion aki, bo ta mira un conexion directo y preocupante cu e ley di reino menciona; e ta un paso prematuro caminda ta parce cu kier asumi caba cu HOfA ta un echo, mientrastanto e ley aki ainda no ta un realidad aproba pa Parlamento.

   Den e texto actual di e ley ta para cu un parti di e placa (voeding) pa e fondo di inversion aki mester bini for di e facilidad di fianza (leenfaciliteit) cu Aruba lo por haya solamente si e acepta e Rijkswet HofA. Cu esaki, ta lanta e cuestionamento si e intencion ta pa forsa e aprobacion di HofA structuralmente via un otro ley.

   E pregunta principal ta: Pa ki motibo kier mara e ley di fondo di inversion aki na HOfA, si ainda HOfA no ta un realidad? E echo ta cu, e mesun splicacion oficial di e ley, e Memorie van Toelichting, ta revela, cu e placa cu Aruba ta scapa na interes danki na e Rijkswet HOfA, lo wordo aloca directamente den e fondo di inversion aki. Pa e motibo aki, e ley aki NO por wordo trata, y mucho menos aproba, di e forma aki. Kinan nos tin un problema grandi: Minister Wever kier pa Parlamento aproba e fondo di inversion aki asumiendo caba cu HOfA ta un realidad.

   Den nos sistema democratico, Parlamento ta e organo supremo cu ta controla Gobierno y e ministernan, y no viceversa. Pa e motibo aki, e decision di Minister Wever riba e ley di inversion aki no por bini mara for di trempan na un Rijkswet asina crucial cu ainda Parlamento mester debati libremente.

   Pakico Minister Wever kier anticipa e rumbo cu Parlamento mester stipula riba e ley di inversion? Pakico e mandatario kier asumi e voto di e sala aki, marando e fondo na condicionnan prematuro?

   Un serie di falta di transparencia continuo: Falta di transparencia: A acepta y manda e concepto di e Rijkswet HOfA sin brinda Parlamento e oportunidad di a bini hunto pa lesa of analisa esaki.

   Falta di base financiero solido: A bay di acuerdo cu e concepto sin conta cu un bista structural y cla riba kico e suma berdadero cu nos pais lo spaar ta.

   Ignora e control constitucional: A laga e Rijksministerraad trata e Rijkswet sin cu e Parlamento di Aruba a haya e documento aki pa evalua debidamente.

   Exclusion institucional: A debilita e control ora a saca e representacion di oposicion for di e Camara di Comercio.

   Intento di imposicion politico: Como e punto culminante, e texto di ley ta pretende awor di mara e mannan di e Sala aki prome cu e debate real a cuminsa.

   Kico lo pasa cu e fondo di inversion si HOFA no continua. Actua comosifuera e Rijkswet HOfA ta un realidad caba ta un paso prematuro cu ta preocupa nos. Awor, e pregunta directo y nesesario na e mandatario ta:  Kico lo pasa si mañan resulta cu HOfA no ta wordo acepta?  Kico lo ta e destino di e fondo di inversion aki si e voeding principal no t’ey?

   Nos NO por aproba un ley caminda e control parlamentario ta inexistente; un ley cu e unico agenda ta pa forsa e implementacion di e Rijkswet HOfA, ancrando e fondo di inversion na e condicion aki. E Rijkswet HOfA aki no ta nada mas cu e mesun proceduranan bieu bisti den un bachi nobo, un intento structural di baha e nivel di control di e organo legislativo aki, locual pa nos ta totalmente inaceptabel.