Lider di Fraccion di MEP, Evelyn Wever-Croes, a presenta consehonan di Raad van Advies y Raad van State riba Ley di Reino HOFA na tur gremio

ORANJESTAD (AAN) – Den e conference room di ATIA, representantenan di gremionan sindical y comercial di Aruba a reuni cu Lider di Fraccion di MEP, Sra. Evelyn Wever-Croes,

pa un analisis profundo di e consehonan emiti pa Raad van Advies di Aruba y Raad van State di Hulanda riba e propuesta di Ley di Reino HOFA y e Landsverordening Waarborging Houdbare Overheidsfinanciën (LWHO). 

Un presentacion basa riba echonan concreto: Kico ta e pregunta real? 

Wever-Croes a defini e postura di e fraccion: "Nos ta di acuerdo cu supervision financiero; e ta necesario. Pero e pregunta real ta: Pakico mester uza un Rijkswet como instrumento si ya nos tin un ley local (LAft) cu a prueba di ta funciona?" 

E dos organonan supremo di conseho ta duna Fraccion di MEP e rason: 

• Raad van Advies (RvA): a adverti cu e proceso tabata iregular, pasobra a acorda e ley cu Hulanda prome cu a pidi nan conseho. Ademas, e Articulo 38 di HOFA ta contra e Constitucion di Aruba. RvA a conclui cu HOFA por wordo aproba solamente si saca Articulo 38 for di e ley. 

• Raad van State di Reino (RvS): A reconoce cu e meta di supervision ta legitimo, pero a haci advertencianan serio riba aspectonan central sin contesta. Aruba NO por sali di e supervision di su mes (Art. 42), e exit ta den man di Rijksministerraad; no tin claridad cua debe exacto Hulanda lo refinancia; y e debe di PPP (Public-Private Partnership) no ta inclui den e “schuldquote”, loke mester wordo cuantifica prome. RvS ta conseha pa haci tur e cambionan aki prome cu manda e ley Parlamento. 

E realidad: Kico tin realmente tras di HOFA? 

Sra. Wever-Croes a desmenti e supuesto bentahanan di Rijkswet HOFA, demostrando cu e realidad ta mustra un panorama hopi diferente: 

• Logro bou di ley local (LAft): Aruba ta cumpliendo structuralmente cu e normanan presupuestario aña tras aña. E realidad ta cu Aruba a logra baha e ratio di Debt-to-GDP na 61% na fin di Maart 2026 (e cifra mas abou desde 2011), cu un pronostico di 48% pa 2028. E rating di nos pais ta basa riba e logronan concreto aki y nos track record, no riba un ley futuro; e Rijkswet ta simplemente un condicion di e fiansa di COVID y no un castigo pa incumplimento. 

• E trampa: Si acepta e Rijkswet HOFA, Aruba lo haya un interes abou riba e fiansa di COVID, lo cual por representa un spaarmento di mas o menos Afl. 300 miyon den 20 aña. Sinembargo, e placa aki lo wordo deposita den un fondo di inversion mara cu cadena. E condicionnan estricto ey ta exclui e proyectonan urgente cu nos pueblo mester awo. 

• HOFA no ta combati corupcion: HOFA ta un ley di norma presupuestario y NO un ley anti-corupcion. Pa combati corupcion, Aruba tin su propio institucionnan fuerte y independiente, manera Algemene Rekenkamer, Ministerio Publico, Destaho Publico, Bureau Integriteit Aruba (BIA) y Ombudsman. E ehempel di Corsou y Sint Maarten ta confirma cu, despues di 16 aña bou di un Rijkswet, e retonan di integridad ta keda; e Rijkswet no a resolve nan. 

Conclusion  

Como conclusion di e encuentro, Sra.Wever-Croes y Fraccion di MEP a reafirma cu e proceso pa HOFA no a caba. E propuesta oficial ta pa e gobiernonan negocia e cambionan recomenda pa e organonan di conseho, sin lanta for di mesa, pa asina convence Hulanda cu un Rijkswet no ta necesario.

El a keda demostra cu nos ley local (LAft) ta duna e mesun garantianan sin duna Den Haag e ultimo palabra riba nos finansas. Den su luga, MEP ta propone un alternativa real: un landsverordening reenforsa of un onderlinge regeling cu ta garantisa supervision efectivo sin entrega nos derecho constitucional. 

Fraccion di MEP ta gradici formalmente e asistencia y participacion activo di e representantenan di e gremionan sindical y comercial, kendenan a destaca e balor democratico di tin acceso directo na analisisnan huridico y financiero den e momentonan aki. 

“Aruba a prueba caba cu e disciplina financiero ta posibel bou di su propio ley. E cifranan ta cla: 61% debt-to-GDP, surplus, y un pronostico di 48% pa 2028, tur esaki logra bou di LAft, sin rijkswet. Loke nos ta pidi ta simpel: ban reenforsa e ley cu ta prueba di ta funciona, y laga e ultimo palabra riba nos finansas keda na Aruba”, Evelyn Wever-Croes a termina. 

galleryLider di Fraccion di MEP, Evelyn Wever-Croes, a presenta consehonan di Raad van Advies y Raad van State riba Ley di Reino HOFA na tur gremio/gallery