Post di Minister Gerlien Croes riba medionan social no ta cuadra cu realidad

Parlamentario Hendrick Tevreden:

ORANJESTAD (AAN): Parlamentario Hendrick Tevreden a trece claridad y a frame un posicion fuerte relaciona cu e bishita di e delegacion na Raad van State. Segun Tevreden, e informacion cu a sali den media di comunicacion recientemente y  cu a wordo comparti pa e Minister Gerlien Croes no ta refleha e opinion real di e organo konsehero aki.

Durante e bishita na Raad van State, e delegacion tabatin e oportunidad di dialoga y kompartí pensamentu riba e konseho ku a sali di e organo aki. Tevreden a enfatisá e importansia pa e pueblo komprondé bon kiko ta e realidat tras di e asina yamá "Koninkrijksdossier" ku a keda publiká den prensa hulandes.

Tevreden a splica cu loke a keda publica den media no ta refleha e opinion cu Raad van State a conseha formalmente den su conseho.

Loke e medio di comunicacion a saca, ta mas bien parti di un deliberacion interno, y no e pensamento structural di Raad van State mes den e conseho," e parlamentario a duna di conoce.

E la agrega cu e mes a sinta y a papia directamente cu Raad van State, caminda a keda confirma cu "di ningun manera" e publicacionnan ey ta representa nan posicion oficial.

Un punto di preocupacion grandi pa Tevreden ta e echo cu e Minister di Relashonnan den Reino a topa cu e relato aki den media y a scoge pa publica esaki riba su pagina di Facebook, insinuando cu esaki ta e pensamento di Raad van State.

Tevreden a duna un mensahe cla na e comunidad:

E publicacion cu e Minister a haci riba su Facebook no ta cuadra cu e realidad cu e delegacion a scucha y verifica cerca Raad van State.

Ta lamentabel cu un minister ta uza e tipo di informacion aki sin e verificacion necesario.

E situacion aki, segun Tevreden, ta habri caminda naturalmente pa un debate profundo den Parlamento. E meta principal di e debate aki lo ta pa clarifica e asunto y pa mustra cu no tur ora loke media ta publica ta cuadra cu e pensamento real di e instancianan envolvi.

E parlamentario ta spera cu pueblo tambe por tuma nota di esaki y keda alerta cu e informacionnan cu a circula no ta basa riba echo corecto.