PR di Elmar NV, Audrey Croes:
*E mensahe principal ta pa cuida salud y mantene siguridad
ORANJESTAD (AAN) – Elmar NV ta satisfecho cu e mensahe cu e compania ta compartiendo cu comunidad den conexion cu e temporada di calor. Asina PR di Elmar NV, Audrey Croes, a duna di conoce.
Hunto cu WEB Aruba, pa di cuater aña consecutivo, Elmar a lansa un campaña di concientisacion enfoca riba e temporada di calor. Meta principal di e campaña ta pa comparti informacion tocante siguridad, manera di prepara pa e temporada, y e efecto cu e calor por tin riba e red electrico.
Croes a indica cu e temporada di calor oficialmente a cuminsa prome di juni y lo dura te cu final di september, luna cu historicamente ta registra e temperatura mas halto di aña. Segun e, Aruba mester ta bon prepara pa e periodo aki.
El a splica cu Aruba tin dos temporada principal: e temporada fresco y e temporada di calor. Pa e ultimo aki, comunidad mester tuma diferente accion di preparacion, entre otro rond di cas, estilo di bida y otro medida preventivo.
Croes a duna di conoce cu Elmar ta tumando diferente accion pa e temporada di calor. Un di esakinan ta e midimento continuo di carga riba e red. Aunque e proceso aki ta tuma luga durante henter aña, tin preparacionnan specifico pa e temporada di calor.
Durante e temporada di calor, Elmar ta midi e carga pa e siguiente aña. E ta un aña di trabou adelanta cu ta haci pa e potencial demanda cu lo tin e aña siguiente. Elmar ta transferi e carga pa balansa e red y tambe ta aumenta e capacidad cu transformer riba palo di luz.
Ademas, Elmar ya a completa trabounan grandi di mantencion riba ekiponan di voltahe halto den e siete substacionnan rond di Aruba prome cu e inicio di e temporada. Trabounan di mantencion mas chikito riba liñanan di coriente ta continua durante henter aña, na unda ta informa comunidad previamente mediante comunicacion oficial.
Segun Croes, e trabounan aki ta continua y Elmar constantemente ta monitoria e tempo. “Na momento cu tin un ola di calor y autoridadnan concerni ta comunica cu mester prepara pe pa siguridad pa comunidad, y ta saca advertencia di peliger, Elmar ta haci cierto ahustenan riba e trabounan di mantencion of ta cancela cierto trabounan pa no tin efecto acerca riba salud di comunidad”, Croes a duna di conoce.
El a agrega cu e mensahe principal di Elmar pa comunidad ta pa cuida salud y mantene siguridad durante e temporada di calor. E compania ta conseha comunidad pa cuida otro, specialmente adultonan mayor y muchanan, cu ta e grupo mas vulnerabel durante periodonan di temperatura halto.
Pa loke ta trata consumo di energia, Croes a conseha pa uza coriente di manera consciente unda cu esaki ta posibel, sin compromete siguridad ni bienestar. El a recorda cu e factura di energia ta wordo calcula basa riba e cantidad di kilowattuur consumi. “Mas kilowattuur uza, mas lo mester paga, cu ta algo cu mester tene cuenta cu ne tambe.”
Pa conclui, Audrey Croes a invita comunidad pa bishita e pagina informativo temporadadicalor.com, iniciativa di Elmar y WEB Aruba, unda por haya diferente recomendacion, informacion y tips util pa enfrenta e temporada di calor di manera segura y responsabel.
