Door di inversionistanan stranhero, mayoria placa di Airbnb ta dal un spin na Aruba y despues ta bay bek afo

Segun Presidente di Sindiacato STA, señor Diego de Cuba:

ORANJESTAD (AAN): Segun Presidente di Sindiacato STA, señor Diego de Cuba, e negoshi di Airbnb (AirBed and Breakfast) a lanta cabes hopi lihe mundiamente y a desvia for di loke e tawata den su concepto original. 

E storia tras di e tipo di negoshi aki a inicia na San Francisco, ora cu dos hoben amigo cu tawata comparti un apartamento, tawata pasando den dificultad pa cubri huur. Durante un conferencia grandi caminda hotelnan tabata yen, nan a haya e idea creativo pa hospeda bishitantenan riba colchonnan di aire den nan apartamento. E idea tabata simplemente pa yuda hende haña un luga accesibel pa keda y alabes genera entrada extra pa cubri nan gastonan. 

Despues, e concepto a crece rapidamente y a bira loke e ta awendia, na unda ta huur ful e cas. Loke a cuminsa como un solucion financiero creativo entre amigo cu no tawatin manera pa paga huur, awe pa hopi hende a bira un negoshi profesional y un oportunidad di inversion pa hendenan mas bien, di bon manera financiero. Na Aruba tambe, e tendencia aki a cuminsa lanta cabes hopi lihe den e ultimo añanan. 

Señor de Cuba a remarca cu tin hopi ganashi ora di converti un cas den un Airbnb. Y si e Airbnb ta di localnan, esaki lo ta un plus pa Aruba pasobra e placa ta keda draai rond na Aruba mes. Pero segun e, hopi inversionista cu Aruba ta atrae, hopi di e placa cu ta drenta Aruba, ta dal un spin y bay bek afo. 

Den esaki, señor de Cuba ta remarca cu no tin control rigido, cu ta necesario y importante, di parti di Gobierno. E hecho cu hopi placa ta bay bek afo, señor de Cuba a expresa, ta lamentabel y tin Aruba tranca. 

“Ta masha bunita pa atrae inversionista pa nos pais. Pero mayoria di nan ta traha e placa y e placa ta dal un spin y ta bay bek afo. Gobierno mester purba pa e companianan aki laga mas placa posibel riba e pida baranca aki pa economia por draai cu hopi mas placa den circulacion”, señor de Cuba a enfatisa.