SPA a duna Alto Comisario fecha 15 Juni pa contesta e cartanan cu nan a manda

Señor Lito Laclé di Sindicato di Polis:

• Siguridad di polisnan riba caya ta entre e preocupacionnan mas urgente 

ORANJESTAD (AAN) Presidente di Sindicato di Polis Aruba (SPA), Lito Laclé, a expresa durante un entrevista cu DIARIO cuminsamento di e siman aki varios punto di preocupacion cu tanto e sindicato como miembronan di cuerpo policial ta enfrenta actualmente.

   Segun Laclé, siguridad di e polisnan cu ta presta servicio activamente riba caya ta entre e preocupacionnan mas urgente. Entre e temanan cu ta sigui genera inkietud ta e falta di bulletproof vests y bodycams, asunto cu segun e ta riba mesa ya pa hopi tempo.

   Laclé a informa cu durante un bishita reciente na Departamento di Wetgeving en Juridische Zaken (DWJZ), el a wordo informa cu na juni 2025 e departamento a manda un mail oficial na Alto Comisario Ramon Arnhem, na unda nan a indica e proceduranan legal cu mester wordo sigui pa haci cambionan necesario den cierto legislacion. Sin embargo, segun informacion ricibi, DWJZ ainda no a ricibi ningun reaccion oficial riba e asunto.

   Mientras tanto, SPA ta sigui insisti cu tanto Alto Comisario como Ministerio di Husticia y Parlamento di Aruba pa duna prioridad na siguridad di e polisnan cu diariamente ta presta servicio riba caya. E sindicato ta spera tambe un contesta concreto tocante e fecha cu e polisnan den straatdienst finalmente lo ricibi e materialnan di proteccion cu tanto tempo ta wordo discuti.

   Segun Laclé, SPA a duna Alto Comisario te cu dia 15 di juni pa contesta e cuatro cartanan cu e sindicato a manda na cuminsamento di e siman aki, den cual siguridad di polisnan riba caya ta ocupa un lugar central.

   Ademas di esaki, presidente di SPA a señala cu tin otro asuntonan importante cu e sindicato ainda lo sigui atende. Un di nan ta e situacion di e ‘burgerpersoneel’, unda segun e tin diferencia den trato tocante pago di overtime. Actualmente, menos di 60 empleado ta carga cu e trabao cu anteriormente tabata reparti entre aproximadamente 144 persona.

   Segun Laclé, algun di e trahadornan aki ta combina funcion di telefonista cu otro responsabilidadnan operacional, mientras cu ora nan ta traha overtime, no tur ta ricibi compensacion pa e oranan adicional cu nan ta traha. El a enfatisa cu SPA ta sigui atende cu tur loke ta pasa den cuerpo policial y ta sigui traha pa haya mas claridad y solucion riba e diferente preocupacionnan cu ta afecta cuerpo policial.