Prome cu Covid, salud mental tabata un monster sin nomber

Segun Rubiella Toppenberg di Fundacion FADA:

• Awendia mas hende ta papiando di esaki 

ORANJESTAD (AAN): Segun Rubiella Toppenberg di Fundacion FADA, actualmente mas y mas hende ta papia riba e topico di Salud Mental. El a menciona cu esaki no tabata semper asina y no tabata scucha di e topico aki hopi. Segun e, Covid-19 a lanta un stof cu pa hopi tempo tabata drumi.

   El a expresa cu no tabata tin hopi informacion y hopi hende tabata biba, segun el a ilustra, cu un monster cu nan no tabatin nomber pe. Durante Covid e tema aki a sugeri mas y mas. Despues cu FADA a lansa desde aña 2021, e campaña di prevencion di salud mental, hopi mas hende a cuminsa scoge pa papia mas di e tema aki.

   Segun e, e generacion di 1990 bin ariba, ta un generacion cu ta durf di papia hopi di nan salud mental. Esaki, el a menciona ta algo bon, pasobra e generacion aki ta encurasha nan mayornan tambe pa papia y sigui papia di esaki.

   “Aruba ta papiando mas di salud mental. Nos mester sigui papia mas pa e mensahe yega na esnan cu ta tuma decisionnan riba e forma cu nos ta desaroya salud mental na Aruba pa nan comprende e importancia y inverti mas den ayudo pa esnan cu tin mester di esaki”, señora Toppenberg a enfatisa.

   El a remarca cu tur cos cu nos ta haci den nos actividadnan y bida diario, tin di haber cu nos salud mental. Nos escogencianan ta basa of tin efecto riba nos salud mental. Si nos scoge pa haci deporte, nos ta haci escogencia riba nos salud fisico pero tambe pa nos salud mental. Nos ta sinti frustracion ora nos tin hamber y ora nos come, nos ta contento y nos ta alimenta nos curpa fisico y tambe nos salud mental.

   Ora cu nos tin problema, sea na cas, di famia, na trabao, financiero entre otro, si nos no papia di nan of busca ayudo pa nan, nan no ta bira miho. Tur problema para ta keda bira pio. Pa e motibo aki tambe, FADA ta kere cu papia y conscientisa riba prevencion di salud mental ta miho y necesario.

   “Hopi biaha nos ta pensa cu ta solamente un docter por cura nos. Pero na final di dia, e unico hende cu por cura su mes, ta e mes. Pero esaki ta depende di con hopi nos ta desea di yega na un balansa y cura. Esaki nos por haci solamente ora nos acepta cu nos tin un problema y ta busca un yudansa p’e”, señora Toppenberg a enfatisa.