The content originally appeared on:
Diario
ORANJESTAD (AAN): Un di e preguntanan lansa na Prome Minister Evelyn Wever-Croes,
pa un miembro di prensa, durante e conferencia di prensa relaciona cu e acuerdo entre Gobierno di Aruba y Gobierno di Hulanda, ta si tin diferencia entre e e Rijkswet proponi pa Hulanda na prome instante y e Rijkswet Hibrido.
Basa riba e pregunta aki, Prome Minister a splica cu tin varios diferencia entre e dos Rijkswetnan aki. Na prome luga ta bon pa wak e Rijkswet den su totalidad cu tur e beneficionan financiero. Pa loke ta e Rijkswet anterior, un di e puntonan mas importante ta e cu den e Rijkswet ey, Parlamento no tabata tin e autoridad pa establece e normanan.
Den e Rijkswet Hibrido, e definicion di e normanan, e “normstelling”, pues ken ta determina e normanan, ta den un landsverordening cu ta di Parlamento.
Tambe e mandatario a indica cu un otro aspecto importante ta e RAft, cu Aruba no por a sali di dje facilmente. Den e Rijkswet Hibrido, a wordo palabra cu lo bay tin un “duidelijke exit bepaling” indicando ki ora Aruba lo por sali di e Rijkswet aki.
“Mirando e puntonan menciona, por nota cu tin varios diferencia, pero un di e beneficionan mas grandi pa Aruba den e acuerdo actual ta cu Hulanda ta bay compromete su mes pa refinancia e debenan bieu di Aruba”. Prome Minister a expresa.
