The content originally appeared on:
Diario
Minister Geoffrey Wever:
Den prome tres luna a ricibi 627 peticion
DEACI trahando na forma eficiente y rapido
ORANJESTAD (AAN): Pa cuminsa un negoshi of haci cambio den e permiso pa negoshi segun ley, mester haci un peticion pa permiso di negoshi via e website di Departamento di Asuntonan Economico, Comercio y Industria (DEACI) y ta wordo otorga bou di responsabilidad di Minister di Asuntonan Economico.
Den e periodo di januari te cu maart 2024 a ricibi 627 diferente tipo di peticion. Di e 627 peticion ricibi, 277 peticion a wordo trata y e permiso relevante otorga, 196 peticion ta den tramite, 154 peticion no por a wordo trata pa falta di documento of pago.
Di e 627 peticion ricibi y e permiso relevante otorga, 147 ta peticion pa permiso nobo den e periodo di januari te cu maart 2024. Di e 147 permiso di negoshi nobo otorga, 22 tawata pa e eenmanszaak, 21 pa filiaal, 101 pa VBA, y 3 pa un vennoot di un VOF.
E tipo di actividad comercial pa cual mas permiso nobo a wordo otorga ta “houdstermaaschappij, actividadnan di Real Estate, companianan di construccion kleinhandel den diferente articulo manera paña, hoya y e-commerce, y importacion y comercio di auto.”
Na October 2022 Minister Geoffrey Wever a introduci e vestigingsbeleid nobo, cu entre otro e meta pa “speed up” e proceso di otorgacion di permiso dor di elimina diferente rekisito, digitalisa ful e sistema di peticion di permiso y stimula e promising sectors, inversion den centro di Oranjestad y San Nicolas etc. Meta di e vestigingsbeleid nobo ta tambe pa emiti permiso den un periodo di dos siman.
Minister Geoffrey Wever ta gradici DEACI pa percura cu e permisonan pa negoshi wordo emiti na forma eficiente y lihe y tambe pa compila na un forma continuo tur informacion riba e proceso di permiso pa negoshi.
Di hopi decada semper tabatin reclamo riba e cantidad di ‘red tape’ cu empresarionan tin di pasa aden ora di busca forma pa obtene permiso pa habri negoshi nobo. Esaki lo por ta indicacion cu Aruba a cuminsa cambia e trend aki, y lo por yuda empuha comercio nobo riba e isla di e forma aki.
Tur informacion riba e proceso pa permiso di negoshi ta disponibel riba e website www.deaci.aw
