The content originally appeared on:
Diario
E motor CFM56 tin di wordo cambia
ORANJESTAD (AAN): E avion Boeing 737-900ER di Delta Air Lines, cu matricula N805DN cu Diamars atardi 4:17 pm net cu el a lanta vuelo, apenas algun pia den aire a sufri un “backfire” y Compressor Stall na motor #1 (esun banda robez).
Awor a haya sa cu ta un “bird-strike”, esta un parha a wordo ingeri door di e motor, y esaki a ocasiona daño interno, y subsecuentemente e ‘Compressor Stall’. Esey a produci e dos sonido fuerte estilo explosion, pero cu ta mas bien un tipo di ‘backfire’ (mescos cu ta pasa cu motor di auto), y por a mira vlam sali di e motor.
DIARIO a haya informacion nobo cu abordo tabatin 168 pasahero, y 6 miembro di tripulacion.
Pasaheronan a bisa cu e Capitan a papia riba speaker na comienso, y a bisa cu nan tin un indicacion di candela den motor banda robez, y cu e situacion ta bao control.
Enberdad e avion a keda bula rond pa 51 minuut prome cu el a baha bek na Aruba.
Tecniconan cu a bay revisa e motor, a mira cu el a sufri daño ora cu un parha cu tabata bulando, pa malasuerte a bay den e motor. Pero e avionnan Boeing 737 ta diseña cu e por sigui lanta vuelo hasta cu 1 motor so, aunke por a nota un reduccion temporal den velocidad.
E avion no a bula mas, debi cu tin di bay cambia e motor, cu lo bay ta mucho mas facil envez di cambia e piezanan den dje na Aruba. Oficialnan di Aviacion Civil, demas managernan na Aeropuerto tur a bay check e motor.
Delta Air Lines a haye ta busca camber di hotel pa tur e no-residentenan a pasa un anochi extra na Aruba, y a ricibi voucher cu cuminda tambe.
E pasaheronan a wordo poni riba un di e 3 vuelonan di Delta Airlines cu riba Diaranson a bula di Aruba pa Atlanta. E prome cu ta vuelo DAL-9887 cu a lanta pa 1:00 pm, sigui 10 minuut pa vuelo DAL-1752 cu a lanta pa 1:10 pm. Tambe tin vuelo DAL-581 cu a lanta vuelo pa 3:45 pm.
Riba e potret por mira momento cu oficial di Aviacion Civil cu demas managers ta observando e motor #1 modelo CFM56 cu a sufri e “Bird-Strike” aki.
