Ta hopi importante pa mas lihe posibel bin cu un maneho pa importa trahado

Segun President di FTA Hose Figaroa:

ORANJESTAD (AAN): Presidente di Sindicato FTA, Hose Figaroa, durante un entrevista cu DIARIO ta expresa preocupacion pa e falta di trahador den sector horeca, mientras cu temporada halto ta acercando. Den entrevista, Figaroa a bisa cu hotelnan y restaurantnan ta enfrenta un escases di personal cu ta pone presion grandi riba e trahadonan cu tin actualmente.

   Segun Figaroa, FTA a trece e asunto aki dilanti Gobierno y na Dimas den diferente ocasion. Aunke a wordo indica cu tin un maneho den preparacion pa admision di trahadonan nobo cu Aruba tin mester, sinembargo te ainda e sindicato no a mira nada concreto. E presion ta sigui aumenta, mientras cantidad di turista historicamente ta subi durante fin di aña.

   Figaroa ta splica cu hopi trahado ta pasa di un compania pa otro, pero esaki no ta resolve e problema. “Ora un persona move, e puesto cu e laga atras ta keda habri. Nos no ta yudando e escases, nos ta solamente moviendo e problema di un lugar pa otro,” el a señala.

   Segun Figaroa, ta hopi importante pa mas lihe posibel bin cu un maneho pa importa trahado, pasobra di otro banda, lo bira dificil pa yena e bashinan cu trahado local. El a remarca cu legalisacion di personanan cu ta na Aruba caba por forma parti di e solucion, pero no ta suficiente. Segun Figaroa, mayoria di nan tin trabao caba. Si nan cambia di funcion, nan ta laga un otro vacante atras. P’esey, e isla ta den necesidad pa trahadonan adicional, importa bou di condicionnan cla y responsabel.

   E lider sindical ta enfatisa cu Aruba mester sigui promove empleo local, pero realidad ta cu pa mas cu un aña tin funcionnan cu no ta logra yena. P’esey, un cierto porcentahe por wordo ocupa cu trahado local, mientras cu pa e resto lo mester recuri na hendenan di afo.

   Figaroa a agrega cu importacion sin control por crea otro problema social. Pa e motibo aki, Gobierno mester determina cua funcionnan ta realmente necesario, cu cua condicionnan un trahado mester cumpli y con e persona lo wordo integra. “Nos mester importa solamente esnan cu Aruba realmente mester,” el a conclui.