Ley HOFA ainda ta un preocupacion grandi pa Sindicatonan Uni

Lider sindical Sindicatonan Uni, Hose Figaroa:

ORANJESTAD (AAN)- “E Ley HOFA ainda ta un preocupacion grandi pa Sindicatonan Uni”, segun e lider sindical mr. Hose Figaroa a duna di conoce, den entrevista cu Matutino DIARIO. Esey ta e tema cu Dialuna nan a trata durante nan reunion.

   “Nos a manda diferente carta pa Gobierno, specificamente pa Minister Presidente tambe, den cual nos a pidi pa un reunion, tocante e asunto aki, specialmente mirando e hecho cu ya casi dos luna pasa, Minister Presidente a declara cu tin e negociacionnan cu ta andando cu Hulanda, pa loke ta trata cierto ahustenan den e HOFA ey, aunke nos puntonan di salida ta keda, cu nos  tin ningun tipo di necesidad pa bin cu un rijkswet at all.

   Nos lo kier toch papia cu gobierno, intercambia di idea riba kico ta eigenlijk loke nan ta mira como e ahustenan cu nan lo kier haci, y esey nos kier haci prome cu yega na palabracionnan concreto cu Hulanda”, e lider sindical mr. Hose Figaroa a menciona. Figaroa a sigui splica cu nan a palabra ayera, cu nan ta bay bolbe manda recordacion pa Minister Presidente, y nan ta spera cu na corto plazo nan por haya un audiencia den cual e sindicatonan kier combersa specificamente riba kico ta e proposicionnan cu kier haci na Hulanda y explora atrobe e posibilidad di cambia e direccion cu nos ta bayendo aworaki, pa no bay papia di regula supervision financiero a base di un ley di Reino, pero pa mantene esaki na nivel local.

   “Y negocia  cu Hulanda kico ta e posibilidadnan pa mantene tur of parti di e beneficionan financiero cu nan ta dispuesto pa duna, cu nos mester entrega di nos banda, manera nos a palabra, un parti di nos autonomia parlamentario door di regula esaki pa medio di un rijkswet”.