Si mas hende ta bin den Caya, sea local of turista, Caya ta haya bida bek

Segun Elton Arends, di OIG:

ORANJESTAD (AAN)-- Elton Arends, di OIG (Grupo di inversionista di Oranjestad), den entrevista cu Matutino DIARIO, a bisa cu Caya Grandi a haya  hopi placa p’e ta awendia asina keto y sin bida, sea tur lugar ta cera of no tin nada pa haci.

“Nos propuesta y nos vision ta, y e lo sigui asina, cu si hende ta drumi den Playa, sea ta biba den Caya, of ta bin den caya, sea local of turista, e ta trece bida bek den Playa. Pues, nos mester cuminza un caminda. Y nos ta kere ainda den e vision aki, y nos ta para su tras. Y nos ta compronde cu no tur ora ta e gobernantenan so, pero departamentonan tambe ta para den caminda, stroba, y cosnan no ta bay mesun lihe. Bo a wak con nan ta bay pero nos ta haci un yamada atrobe na Gobierno, por fabor. Nos no tin tempo mas!”, Arends a remarca.

El a remarca cu OIG no kier pa inversionistanan perde confianza y no inverti mas, mientras cu Oranjestad mester di tur inversion cu por haya y si esey no sosode awo nan tin miedo cu Oranjestad ta bay keda manera cu e ta.

Aki mester ta involucra tur minister, incluyendo esun di turismo y mester di decisionnan concreto pa por sigui dilanti.