The content originally appeared on:
Diario
Otmar Oduber, lider di Plataforma Nos Pais:
ORANJESTAD (AAN) Otmar Oduber, Lider di Plataforma Nos Pais, a yama medionan di prensa, pa topa cu ne na Parkietenbos, pa haci un denuncia formal riba loke ta tumando lugar den e area aki.
Oduber a expresa cu e ta contento cu miembronan di prensa a mira con trucknan ta drenta y sali for di dump, siendo cu gobierno y e minister concerni ta bisa cu dump ta cera.
E trucknan ta drenta full yen di sushi y no un ni dos, y ta sali bashi. Kiermen, e sushi ta keda atras eynan. Oduber ta haya cu e peor cos cu ta pasando, mientras cu e vecindario tambe a reacciona, representa pa e Comision di Parkietenbos, riba e holo cu ta insoportable.
“Nan ta consider’e hasta como un atentado contra e derecho humano di e habitantenan cu ta biba aki banda. Mi mester secunda nan, mas ainda cu e denuncia cu mi ta haciendo akinan, ta e hecho di e decision cu no a wordo participa na e comunidad di Aruba ni na e bisiñanan, pero cu DOW, den e caso aki, y e Minister di Medio Ambiente a tuma di bay bek na kimamento di sushi, di kima slosh, carcas (bestianan morto) na un forma habri, unda cu tur loke ta wordo kima ta bay simplemente den halto, pasobra no tabata tin e sabiduria ni e durf pa percura pa tin, manera e Huez a duna den su sentencia, un permiso di gendering vergunning, pa por opera aki na dump”, e lider (antes Minister di Medio Ambiente) di Plataforma Nos Pais, a vocifera.
