The content originally appeared on:
Diario
Minister Ursell Arends:
ORANJESTAD (AAN): Diahuebs atardi Minister di Asuntonan di Adulto Mayor a reuni cu Jacques van der Scheer, presidente di Conseho di Supervision di SABA pa nabega un curso nobo pa e futuro di SABA. Un encuentro sumamente fructifero cu ta habri caminda pa establece un relacion renoba cu SABA, reflehando un compromiso comparti pa progreso y bienestar di nos adultonan mayor. Di e forma aki ta cera un capitulo di añanan largo di conflicto y disputa entre SABA y Gobierno di Aruba.
Un di e enfoke primario di e reunion tabata e solucion di e asunto pendiente di derechonan laboral (rechttrekking) cu ta data desde 2008, afectando numeroso empleadonan cu ta den espera di nan compensacion debido. Gerencia di SABA ta den proceso pa ehecuta e pagonan.
E anuncio di un directora nobo ta marca un era nobo den e trayecto di SABA su maneho y eficiencia operacional. E nombramento recien a ser acepta cu elogio for di Ministerio, mirando esaki como un momento pivotal pa fomenta un relacion mas saludabel entre Gobierno y SABA.
Combersacionnan ta andando pa loke ta trata e subsidio pa 2024, y asina finalmente concretisa acuerdonan mediante e Landsbesluit. E paso aki ta subraya un dedicacion mutuo pa asegura stabilidad financiero y desaroyo sostenibel pa e cuido brinda door di SABA.
Minister Arends ta sumamente satisfecho cu e hecho cu SABA ta duna su maximo esfuerso pa atende cu e ampliacion di cantidad di cama. Esaki ta duna espacio pa aloca mas adulto mayor cu tin e necesidad di cuido 24/7. E ampliacion ta aporta na e meta di Gobierno pa alivia e lista di espera pa luganan den cas di cuido y alabes ta significa e resolucion di SABA pa mehora infrastructura di cuido pa adultonan mayor.
Tambe a elabora ariba e infrastructura cu mester di atencion urgente pa asina por cumpli cu condicionnan vigente pa casnan di cuido. Sigur un punto hopi importante pa crea un infrastructura adecuado y facilidadnan accesibel pa garantisa e cuido di nos Adulto Mayor den un forma responsabel.
Gobierno di Aruba ta redifini e relacion cu SABA unda ambos partido ta expresando optimismo pa e futuro. Door di atende cu asuntonan riba areanan critico di desaroyo, SABA ta prepara pa un futuro marca pa progreso y cuido mehora pa adultonan mayor cu sosten y den cuadro di maneho di Ministerio di Asuntonan di Adulto Mayor.
