The content originally appeared on:
Diario
Parlamentario Christiaans-Yarzagaray (MEP):
*Gobierno a firma cu acuerdo cu Hulanda
ORANJESTAD (AAN): Parlamentario Setty Christiaans-Yarzagaray a trece dilanti cu Parlamento a ricibi informacion di Gobierno di Aruba, specificamente di Prome Minister di Aruba, relaciona cu e acuerdo cu a firma cu Hulanda den direccion di un ‘Rijkswet’ den forma hybride.
E parlamentario a remarca cu por tende diferente bos eyfo ta bisa cu Aruba a cera un ‘Rijkswet’ y cu nos ta perde autonomia. “Pueblo, Aruba tin Rijkswet caba hunto cu Hulanda. Esaki no lo ta e prome, si acaso esaki concretisa”, a expresa. E proposicion di e “Rijkwet” aki dimes ainda falta pa wordo formula y yega Parlamento pa e proceso por cuminsa pa wordo trata. Un ehempel di un aspecto cu a wordo regla den un “Rijkswet”, ta tempo cu Aruba a haya Status Aparte, no tabatin un sistema di defensa di frontera. A pidi e asistencia aki mirando e echo cu Aruba ta hopi cerca di Suramerica y ta un pais hopi vulnerabel como isla chikito. Den e caso aki ya caba Aruba tin un ‘Rijkswet’ unda ta reglamenta con e sistema di defensa di nos costanan ta bin pa Aruba na momento cu mester den caso cu algo sosode, Christiaans-Yarzagaray a splica. Asina tin mas rijkswet cu ta reglamenta pa Aruba, a agrega.
Segun informacion cu Parlamento a ricibi di Prome Minister Evelyn Wever-Croes, aworaki a papia riba e temanan cu ta bay wordo hinca den e ‘Rijkswet’. Esaki ta e acuerdo cu ta wordo firma. Pero ainda falta e contenido cu tin cu wordo defini den Rijkswet y posiblemente algun elemento mester wordo hancra den e ley local (“landsverordening”) tambe.
Den liñanan grandi esaki ta nifica cu Aruba ta bay ‘bespaar’ mirando cu e interes ta bay baha di 6.9% pa 5.1%. Ya caba pa e aña aki esaki ta nifica, cu presupuesto ta bay mira Afl. 16 miyon adicional como surplus.
Mientras cu tin politiconan cu ta bisa cu esaki ta bay den saco pa campaña, si nan sa miho di finansas publico, nan sa cu esaki ta wordo marca como un suma cu segun reglamentacion di finansas mag di wordo dedica na inversion of proyecto. “Mester ta un tiki mas inteligente cu esey. Tin un structura di trabao. Unabes cu bo a presupuest’e mescos cu aña pasa, e ta bay end-up den surplus na unda e ta bay dedica na realisacion di proyectonan y tambe pa paga debe”, a enfatisa.
E parlamentario a indica cu no ta asina cu ta haya un placa liber pa despues bay ‘malgasta’ esaki. Riba un termino largo, a agrega, esaki ta representa mas cu Afl. 300 miyon di besparing durante e añanan. Esaki solamente riba e prestamo di Covid, esta Afl. 916 miyon cu a fia di Hulanda.
Parti di e otro condicionnan cu a wordo informa den Parlamento ta cu awor Hulanda lo ta mas dispuesto pa inscribi riba prestamonan existente manera e financiamento di proyectonan PPP di Watty Vos Boulevard, Hospital, Green Corridor unda cu esaki a surpasa Afl. 2.0 biyon (sin conta interes) e tempo di gobernacion di AVP. Parti di e fiansanan aki Hulanda ta dispuesto pa subi mercado internacional y inscribie pa asina Aruba por haya un interes mas abou y alivia e cantidad cu di interes cu pais Aruba ta paga total pa aña.
Actualmente, gobierno di Aruba ta pagando mas cu Afl. 300 miyon florin pa aña na interes. Imagina awor si por spaar 100 miyon cada aña of mas na interes, cuanto espacio esaki lo duna gobierno pa realisa proyectonan, Setty Christiaans-Yarzagaray a señala.
Tin mas puntonan pero un importante di e Rijkswet ta, con ta sali di e ‘Rijkswet’ aki. Con ta haya un fecha di expiracion na dje. Probablemente esaki ta mara na con ta bay hiba un finansas publico mas responsabel, manteniendo na reglanan. El a agrega cu otro punto importante ta cu locual ta trata e RAft, unda cu tabatin condicionnan den e ley cu Parlamento, sigur Fraccion di MEP y su persona, no por a biba cu ne ta bari for di mesa.
Parlamentario Christiaans- Yarzagaray a finalisa indicando cu aworaki ta bay trata un “Rijkswet’ nobo, unda e proceso ta cuminsa di nobo y cu e por concretisa pa spaar Aruba hopi placa di e odisea cu e gabinete berde a laga Pais Aruba aden.
