The content originally appeared on:
Diario
Ministro Ursell Arends:
ORANJESTAD (AAN): Gabinete Wever-Croes II a anuncia Diabierna mainta cu a yega na un acuerdo entre gobierno di Aruba y Hulanda.
Den e acuerdo hibrido aki lo regla e definicion di e normanan di e rijkswet y e normanan financiero via un landsverordening, manera cu ta awor den LAft. E acuerdo aki tambe lo contene, entre otro, supervision financiero, escalacion, posibilidad pa Public Private Partnership y areglo pa con ta sali di e rijkswet.
Manera cu e acuerdo aki worde firma lo tin un reduccion den e interes di nos debe cu Hulanda di 6.9% pa 5.1%. Pues esaki ta nifica cu pa aña lo tin un suma di 16 miyon Florin cu awor por worde uza pa reinverti ariba nos pais. Un monto cu lo crece ainda mas ora cu e rijkswet keda cla y e interes baha na 3.4%.
Cu e espacio financiero adicional, pais Aruba por percura pa e fruto di nos economia yega na esnan mas vulnerabel den nos comunidad. Un reparticion mas husto lo nifica mehoracion den e bienestar di nos Adultonan Mayor. Mihor cuido, mas accesibilidad y amplio participacion ta entre e metanan mas importante di e Ministerio di Asuntonan di Adulto Mayor. Tambe, lo enfoca ariba e retonan cu cambio climatico ta impone ariba nos isla. Un proceso cu sigur mester di nos atencion inmediatamente.
Aruba a demostra cu e por maneha su finanzas publico responsablemente. Esaki ta duna un señal sumamente positivo na es cu kier inverti ariba nos isla y na su turno yuda nos crece nos economia. Un economia fuerte di cual nos tur por beneficia. Specialmente esnan mas vulnerabel.
