Varios luna pasa a duna instruccion pa cera Departamento di Rijbewijs y muda esaki pa otro edificio

Segun Minister di Husticia Arthur Dowers:

ORANJESTAD (AAN): Siman pasa diabierna, Departamento di Rijbewijs hunto cu sindicato SPA tawata tin un accion pa mustra nan malcontento cu e condicion di edificio di rijbewijs y e condicion cu e trahadonan ta trahando eyden y e molester tambe cu e situacion tin pa e bishitantenan cu ta bin pa haya servicio.

Minister di Husticia, Arthur Dowers a declara, cu e accion aki no mester a tuma luga pasobra el a duna instruccion ya un paar di luna pasa caba pa e edificio aki wordo cera y pa mudamento pa un otro edificio tuma luga. Sinembargo, esaki no a pasa por lo tanto e lo bay tuma contacto cu leiding di Korps pa mira dicon esaki no a tuma luga.

El a expresa cu e no ta di acuerdo con Sindicato SPA a trece esaki dilanti y bisa cu Gobierno no a haci nada. Segun e, sindicato ta na haltura cu el a duna ordo pa cera e luga y segun e, e sindicato mester a bay cerca leiding enbes di bay den accion.

E minster a indica si cu e ta di acuerdo cu e trahandonan y cu nan no por sigui traha den e condicion aki. Y pa cua motibo, el a duna ordo pa esaki stop for di algun luna pasa caba despues cu el a bishita e departamento. E tempo ey caba el a ripara cu e condicion ta hopi malo y salud di tanto personal y bishitantenan ta na peliger.

“Tur cos ta na werki pa hopi aña caba. Mesora mi a duna ordo na leiding cu nan mester sali for di eyden per direct. Den pasado mi a duna ordo tambe y a wordo cumpli. E biaha aki esaki no tawata e caso y pa mi, esaki ta inaceptabel”, Minister Dowers a expresa.

E minister a bisa cu el a wordo asegura cu tin un luga pa e departamento aki. El a duna di conoce cu e lo acerca Korps pa sa kico por a sosode cu su ordo no a wordo cumpli. Pero esaki, segun e, ta den man di e leiding di KPA pa ehecuta e ordo cu el a duna pa move e departamento aki pa un otro edificio.