Situacion di HOH ta den crisis alarmante pa motibo cu gastonan a aumenta drasticamente

Gina Maduro, Presidente di Sindicato AVB preocupa:

*AZV ta den combersacion pero solucion duna no ta apto pa e urgencia aki 

ORANJESTAD (AAN) -- Gina Maduro, Presidente di Sindicato AVB , den entrevista cu Matutino DIARIO a expresa cu loke ta pasando na hospital ta un crisis, debi cu di principio no a duna mas placa, y awor a escala y tur cos a bira peor.

“T’asina cu di parti di e Sindicato AVB, nos ta sinti cu regularmente e Raad van Bestuur di Hospital (e tres directornan) nos tin continuamente oportunidad pa regula, y continuamente nos ta wordo poni na haltura cu nos tin un dekort. Dus, e gastonan di Hospital a aumenta drasticamente, cu diferente factor, entre otro gastonan medico. E remedi y materialnan a subi cu casi 30%. Pues tin un aumento drastico den esey. E edificio tambe tin expansion, y awor gran parti ta cla, nos tin e gasto di awa y coriente cu tur ta subi. Si bo wak e Hospital prome cu e gebouw  tabata 18 mil meter cuadra, awo tas 35 mil meter cuadra. Tin dos toren A y B cu nan gastonan tambe ta subi. Tambe un di e situacionnan ta cu e di tres fluho di placa (derde strong) a cay afo y pashentnan cu mester haya MRI, etc., e ultimo lunanan ta bay busca servicio na otro caminda door cu tin situacionnan interno akinan”, Maduro a señala. Gina Maduro a agrega cu semper Hospital tabata tin deficit cu tabata yena cu “derde strong” pero un bez esaki cay afo no tin manera mas pa yega e bashi aki, y esey a pone cu e situacion a bira hopi alarmante na Hospital.

“Y no ta di awo e t’asina. Hospital a manda diferente carta y diferente combersacion cu AZV. Directiva di AVB a sinta tambe cu e Hunta Directiva di Hospital; Raad van Toezicht a pone nos tambe na haltura di e situacion. Di nan parti nan tambe a sinta cu AZV, y hasta cu Gobernador nan a sinta pa señala e situacion aki, cu ta un situacion hopi delicado y hopi erg si ta sigui den e forma aki. Pero di parti di AZV mes tin combersacion pero e solucion cu ta wordo duna no ta uno apto pa e urgencia aki”, Gina Maduro, presidente di Sindicato AVB a señala.