Seis mil persona lo ta activo durante CaribeWave, diahuebs 21 di Maart proximo

​

Rino Hermans, director di CMO:

“No por descarta riesgo di un Tsunami 

ORANJESTAD (AAN) –Rino Hermans, Director di Crisis Management Office “CMO” (antes conoci como Bureau Rampenbestrijding, den entrevista cu DIARIO a informa cu tur cos ta cla, vooral na Oranjesad, pa e ehercicio di CaribeWave, cu lo tuma lugar diahuebs 21 di Maart.

            Hermans a señala cu scolnan ta bayendo basta bon, nan ta preparando, nan a entrena caba y nan registracion tambe ta tumando lugar.

            Aruba ta un di e paisnan unda cu seis mil hende lo participa den e CaribeWave. E cantidad di personanan ta tiki, teniendo cuenta cu na 2016 tabata tin 27 mil hende cu tabata activa riba e dia ey.

            Rino Hermans a adverti cu esaki ta un riesgo inminente cu tin. Mescos cu ta e caso cu horcan, Aruba mester ta preocupa cu e scenario di Panama, cu ta un menaza continuo. Asina bin cu un temblor bao di awa, cu ta crea un Tsunami, Aruba ta bira victima. E sector economico na e banda cu e ola ta bay subi. “E aña aki nos ta train 3 meter di haltura cu energia, kiermen ta bay para meymey di caya”, Hermans a subraya.

            “E erosion di nos costanan por wak’e. Nos ta wak cu nos costa ta comiendo, cambio di clima ta un factor cu ta hisando e riesgo un tiki mas den nos costanan”, el a agrega.

            Hermans a indica cu nos ta confia mucho cu nada lo no pasa, y nos no ta prepara. Nunca ningun hende a kere cu un pandemia lo yega Aruba. “El a yega y nos a deal cu ne dos aña. Y esaki ta cosnan cu nos tin cu prepara conhuntamente como comunidad”, Rino Hermans a señala.

            E preparacion pa CaribeWave ta creciendo y tin un acercamento pa un plan di seguridad, peticionnan ta drentando na gran escala, señor Rino Hermans, Director di CMO a indica.