The content originally appeared on:
Diario
DIARIO a informa riba aumento gasto militar den presupuesto Hulandes
*Aunke Aruba no ta den NATO, desaroyo ta importante pa Aruba
*Marina Real participante na e ehercicio mas grandi desde guera friu
ORANJESTAD(AAN)—Dia 15 di maart 2021, ainda den e ambiente mundial di Covid-19, votadornan na Hulanda a bay urna electoral y a scoge pa loke despues di basta problema, a bira e cuarto Gabinete dirigi pa Mark Rutte, cu dia 10 di Januari 2022 a presta huramento.
Mark Rutte, kende a kibra record di e estadia den funcion di Prome Ministro Hulandes y asina Presidente di e Conseho di Ministro di Reino, a drenta un fase nobo, cu basta peliger pa su lugar preferencial cerca e votador Hulandes.
Na 2023, ya e eleccionnan pa Provinciale Staten, cu a trece cambio den e Senado Hulandes tambe, a mustra riba problemanan serio riba tereno politico na Hulanda cu a mira surgimento di politiconan hoben pero tambe e partido nobo BoerBurgerBeweging, cu mustra riba camabio.
Mientras cierto gobernantenan Hulandes tabata trata na presenta Gobierno Evelyn Wever-Croes di Aruba den un margen incorecto, e problema mas grandi pa Reino, tabata e realidad di e situacion serio den mundo politico Hulandes, pa cual DIARIO continuamente a adverti.
Dia 7 di Juli 2023, Gobierno Mark Rutte number 4 a bay cas y Mark Rutte a anuncia cu e no ta pone su mes disponibel pa encabeza e lista di su partido.
E impresion cu el a crea tabata, cu e lo a haya empleo den mundo di enseñansa.
Mark Rutte a scapa di un situacion sumamente doloroso pa su partido bieu durante eleccion cu resultado di sorpresa, cu a trece un cambio total den Gobierno di Hulanda y asina Gobierno di Reino.
DIARIO corectamente a adverti Aruba, cu Reino por a spera desaroyonan sorprendente no pa motibo di Aruba, pero pa motibo di e situacion internacional y e situacion politico nobo na Hulanda, cu tin problema pa forma un Gobierno nobo.
Den e situacion aki, DIARIO a vigila tambe e gastonan cu a bini dilanti den e presupuesto di Reino, cu ta den poblema financiero serio, pero mester a aumenta su gastonan di Defensa, manera DIARIO a publica basta dia pasa ora e presupuesto Hulandes a wordo trata.
Hulanda a subi su gastonan pa aumenta e cantidad di militarnan activo den Reino Hulandes, caminda hopi propaganda ta wordo haci pa anima hobennan bolbe den servicio militar. DIARIO a mustra Aruba riba e informacionnan cu a bini dilanti den mundo politico Hulandes, cu hasta a papia di reactiva servicio militar obligatorio, cu lo afecta hobennan di Aruba tambe.
Tur esaki ta uni awor na informacionnan di DIARIO cu Mark Rutte no tin intencion pa drenta mundo di enseñansa, pero mas bien ta e candidato principal pa bay dirigi NATO(OTAN), cu ta e aliansa Noord Atlantico cu a nace despues di Segundo Guera Mundial y cu ta exigi cu si un pais miembro di NATO wordo ataca, tur otro pais miembro drenta den accion.
Ta bon pa aclarea cu no ta Reino Hulandes pero pais Hulanda ta parti di e organisacion cu actualmente tene e ehercicionan mas pisa den su historia den un situacion mundial tenso.
Importante ta bira awor e noticia cu pa Mark Rutte, ora e baha como Prome Ministro Hulandes y dirigente di Reino Hulandes, bira dirigente di e organisacion internacional militar, Hulanda mester cumpli cu e exigencianan militar di NATO (OTAN) pa e sumanan cu e ta inverti den su defensa y asina su aparato militar, cu no ta cuadra e momentonan aki cu e exigencianan di NATO.
Hulanda mester inverti mas placa den e organisacion militar di NATO.
For di Guera Friu no a conoce un ehercicio similar di NATO. Hulanda den e proximo lunanan lo conoce participacion di Cinco Mil militar y dos barco militar di cual uno basta conoci na Aruba, cu ta Karel Doorman.
E ehercicio ya a haya su inicio y na cual Arubianonan cu por ta forma parti di mundo militar Hulandes, tambe lo por participa.
Cu Rutte tabata en busca di un posicion den seno internacional tabata conoci. Pero e puesto cu a resta awor ta di Secretario General di NATO y Rutte ta conta cu sosten di Presidente di Merca y otro dirigentenan politico di paisnan di NATO, den e funcion aki.
Informantenan clave, cu a permiti DIARIO prepara Aruba pa desaroyonan cu awor ta haya contenido sumamente sorprendente den Reino, ta pendiente mas desaroyo interesante den seno di Reino, caminda un Informador nobo mester trata na yega na un Gobierno pa Hulanda.
Mientras no tin Gobierno Hulandes nobo, Rutte ta Prome Ministro, hasta como aspirante pa dirigente nobo pa Aliansa Noord Atlantico militar!
