Renobacion di Riu Palace Aruba ta fortalece calidad y competitividad di nos turismo

Parlamentario Jennifer Arends-Reyes:

ORANJESTAD (AAN): Parlamentario Jennifer Arends-Reyes, Presidente di Comision di Turismo di Parlamento di Aruba, a bishita recientemente Riu Palace Aruba, unda el a ricibi un presentacion y un tour amplio di e facilidadnan despues di un renobacion cu a representa un inversion di aproximadamente US$106 miyon.

Durante e bishita, Arends-Reyes tabatin oportunidad pa conoce e diferente facilidadnan renoba y observa e transformacion cu e propiedad a pasa aden. E renobacion tin como meta eleva ainda mas e calidad di e producto, servicio y experiencia cu e hotel ta ofrece na bishitantenan di Aruba.

Segun Arends-Reyes, inversionnan di e magnitud aki tin gran importancia pa futuro di industria turistico di Aruba.

“Pa Aruba sigui competitivo como un destinacion turistico di nivel halto, ta esencial cu nos producto turistico sigui evoluciona y renoba. Inversionnan manera esaki no solamente ta eleva calidad di nos oferta hotelero, sino tambe ta fortalece nos economia, genera actividad economico y contribui na desaroyo continuo di nos industria di hospitalidad,” Arends-Reyes a expresa.

Como Presidente di Comision di Turismo di Parlamento, Arends-Reyes ta considera contacto directo cu sector turistico esencial pa comprende tanto e oportunidadnan como e retonan cu industria ta enfrenta.

“Bishita nos propiedadnan turistico ta brinda nos e oportunidad pa tende directamente for di e sector, observa e inversionnan cu ta wordo haci y continua e dialogo tocante con nos por sigui desaroya un turismo sostenibel, competitivo y di calidad. Turismo ta e motor principal di nos economia y ta importante pa nos sigui traha hunto cu tur actor involvi pa proteha y fortalece e sector aki pa futuro,” el a indica.

Arends-Reyes a expresa su agradecimento na General Manager Rose Mary del Carmen Francisco, Hotel Manager Edgar Arialdys, Regional Commercial Director Derrick Martin, Vice President Juan Blanco y henter e team di RIU Hotels & Resorts pa e invitacion, hospitalidad y tour informativo.

Finalmente, e parlamentario a felicita RIU Hotels & Resorts cu e inversion significativo y renobacion di Riu Palace Aruba.

“Mi kier desea RIU y henter su team masha pabien cu e renobacion impresionante aki. Esaki ta marca un capitulo nobo pa Riu Palace Aruba y ta un muestra di confianza continuo den Aruba como destinacion turistico. Nos ta aprecia inversionnan cu ta contribui na mantene nos producto turistico na un nivel internacional halto,” Arends-Reyes a conclui.