Putin ta lansa atake directo contra paz mundial

Vladimir Putin ta tranforma guera friu den guera cayente

*Mundo liber ta wordo pusha contra muraya di guera

*Mundo ta entrega parti di Ukraine na teror Comunista? 

ORANJESTAD(AAN)- For di momento cu comunismo a presenta su mes na planeta tera, tabata conoce cu Union Sovietico lo no hala atras pa nada.

Lening y Stalin ta wordo considera parti di e grupo di lider ma cruel cu mundo a conoce.

E guera Comunista a avansa y a podera di e loke tabata su mes “socialismo” aunke for di principio e lidernan Ruso a adverti cu Comunismo ta bay mucho mas leu cu loke Socialismo tabata pretende.

Scondi tras di e mascara cu comunismo ta salbacion pa hende pober y sin poder, lidernan Comunista a avansa den un mundo caminda un aliansa entre Union Sovietico y mundo liber, mester a pone fin na e epoca di Hitler.

Ta den e horor di Hitler a nace e bataya uni di Union Sovietico y mundo liber pa despues di Segundo Guera Mundial, e muraya di Berlin bira e simbolo di e guera friu den e buskeda di poder mundial di Union Sovietico.

Vladimir Putin a sirbi den e cuerpo cruel di agentenan secreto di KGB, e sistema di persecucion y spionahe di Rusia, cu a destrui bida humano pa asina Union Sovietico por a plama su propaganda falso rond mundo.

Na final di Siglo 20, e union di republicanan Sovietico a spart for di otro y mundo a biba cu e solucion, cu el a vence Comunismo.

Rusia a habri porta pa comercio di paisnan liber, cu a cay den un trampa despues di Guera Mundial.

Ta den e epoca despues di Segundo Guera Mundial, Comunismo a plama rond mundo y cu propaganda falso a proclama cu “Solo el Pueblo salva al Pueblo” cu ta haya loke resta den wea di lider Comunista pa come y mientras nan cera nan boca y no mishi cu e poder di lidernan Comunista.

Na 2022, despues di ya a anexa otro estadonan anterior di Union Sovietico cu tabata estado liber, Rusia bou Vladimir Putin a entrega mundo e prueba cu ser lider di Rusia ta nifica cu bo ta conkistador di propiedad di otro.

Cu placa cu el a kita for di boca di Pueblo Ruso, Vladimir Putin mescos cu otro lidernan Ruso prome cune, a cumpra hendenan manera Nicolas Maduro, Fidel Castro, a penetra den partidonan politico y organisacionnan di trahadornan rond mundo.

E momento pa realisa kico a pasa cu mundo, a yega.

Mundo por evita un guera, cu ya a cuminsa? Kico mundo ta haci awor cu Putin a dicidi cu e ta anexa, comberti parti di Ukraine cu el a conkista, den su teritorio?

Kico mundo despues di tanto luna di guera y perdida di bida humano, ta haci contra Putin, cu ta lomba contra muraya y si ta necesario lo uza bom atomico?

E bandera Comunista nunca a wordo dera na Rusia, camnda ayera sigur e “hora cero” a yega.

E “hora cero” ta terminologia cu ta wordo introduci den un novela pa simbolisa e momento cu tur cos ta transforma.

Awe mundo mester enfrenta realidad y e pregunta grandi na momento DIARIO ta prepara su edicion di awe ta, kico ta spera mundo awe?

Putin a declara guera na mundo cu su intento di anexa parti di Ukraine, cu tin sosten di henter mundo liber.

Kico mundo lo haci? Esaki ta e topico di combersacion ayera mientras e realidad di Comunismo ta wordo presenta na mundo.

E realidad di un sociedad sin salida. Un dictadura den cual hende no tin ningun balor y den cual tur anhelo di hende manera adelanto social, ta wordo uza pa a crea un imperio di teror.

E bom nuclear, lo rementa?

Putin a laga caminda habri pa dialogo?

Un cos ta sigur. E hora cera a yega y mundo no por sigui ignora e forma cu Comunismo a logra tene mundo den su gara cu e menasa di bom nuclear y final di paz mundial, si algo resta di mundo.

Putin a pone e carta cu ta e berdad di e Guera Friu for di final di Segundo Guera Mundial riba mesa cu e cara di teror cu un dia a Hitler a presenta y a forsa mundo liber bringa hunto cu Comunistanan cu a cuminsa nan conkista cu e separacion di e dos partinan di Alemania y e muraya di Berlin cu nunca a cay!