Merca ta subi su tasa di interes pa prestamonan

The content originally appeared on: Diario

Florin Arubano ta mara na e Dollar Mericano cu ta wordo influencia — *Kico aumento di mas peso riba prestamo lo ocasiona pa biahenan? 

ORANJESTAD(AAN)- Vigilancia di e situacion mundial actual ta di importancia grandi pa tur pais.

Uno di e informacionnan internacional ayera a mustra cu Banco Central di Merca a anuncia cu el a subi e tasa di interes riba debe manera hipoteca, credito y inversionnan entre otro.

E pensamento tras di e decision gubernamental ta, cu si hende gasta menos y produccion keda mescos, inflacion produci pa aumento di prijs, ta baha.

E realidad pa publico na Merca ta, cu a bira mas dificil pa haci prestamo debi na e tasa mas halto di interes.

Pero no solamente pa Merca pero pa otro paisnan e decision lo tin resultado. E decision ta haci cu e tasa di cambio di Dollar a subi loke pa paisnan Europeo lo ta beneficioso ora nan ta exporta nan productonan pa Merca.

Kico e resultado di e medida Mericano lo ta pa Aruba? Kico su resultado lo ta pa e cantidad di prestamonan cu ta wordo haci pa hende realisa biahe?

Ta wordo spera cu e tasa di interes riba prestamo, por sigui subi na Merca, como medida pues pa stop inflacion.

Hopi Mericano mes tin reserva contra e medida, cu manera ya a wordo bida, lo aumenta e costo di prestamo, aunke e prijsnan mes no ta baha.

Importante ta bira pa determina, kico e resultado lo ta den mundo di biahe.

Na Europa companianan ta contento cu e aumento di e tasa di interes riba prestamonan pasobra e ta positivo pa exportacion di paisnan Europeo pa Merca.

DIARIO ta den contacto cu informantenan pa haya mas informacion di e particularidad, cu ta mustra cu na Aruba mester tin atencion pa medidanan cu gobiernonan na tur pais di mundo ta tuma, pa confronta inflacion y otro situacionnan cu a presenta.

Pa Aruba e topico sigur ta interesante y lo ta bon pa tur sector atende cu e desaroyo aki, cu lo tin resultado pa Aruba.