Pueblo ta wordo invita pa deposita nan desperdicio den e baki permanente na Barcadera

Maikel Gomes, PR di BCI:

*Baki den bario ta para temporalmente 

ORANJESTAD (AAN)-- Señor Maikel Gomes, Relacionista Publico di Bureau City Inspector (BCI), den entrevista cu Matutino DIARIO a referi na e apertura di Zona di Desperdicio, cu a tuma lugar dia 1 di Juni caba, na Barcadera (na Ecotech).

El a relata cu su persona mes tabata presente hunto cu e Minister di Turismo, y Minister di Asunto General, Ecotech, entre otro partnernan.

“Den e caso aki ta un baki permanente den bario,  manera mi ta mir'e, y ta for di 7’or di mainta pa 3’or di atardi, di Diadomingo pa Diadomingo, pues tur dia. Eynan e publico por deposita nan sushi cual ta wordo separa, tira diferente mescos cu den baki den bario, y e unico casonan di sushi prohibi pa trece ta: desperdicionan di cushina y baño, materialnan peligroso manera kimico, materialnan medico y infeccioso manera, entre otro, angua, material toxico inflamable y bestia morto.Bestia morto ta bay directamente pa Serlimar, manera semper” Maikel Gomes a bisa.

El a agrega cu si e personanan bin cu nan sushi separa caba ta miho, y nan ta wordo guia door di personal, pa tira e desperdicionan na e diferente bakinan cu tin. Ecotech ta deal cu e proyecto aki directamente, señor Gomes a señala.

El a indica tambe cu Baki den Bario mes ta para temporalmente, y mientras tanto, e publico ta wordo pidi pa hiba nan desperdicio na e baki permanente, na Barcadera. Minister tin na bista seis lugar mas pa pone baki permanente, pero ainda no ta conoci na ki lugar, ni fecha pa cuminaza.