Prome Minister Mike Eman y Secretario di Estado Eric van der Burg a dialoga tocante cooperacion y oportunidad nobo den Reino

ORANJESTAD (AAN): Prome Minister mr. Mike Eman, hunto cu Minister di Relacionnan den Reino, mr. Gerlien Croes,

a tene un reunion cu Secretario di Estado di Hulanda, Eric van der Burg, na Bestuurskantoor. Durante e encuentro a intercambia idea tocante diferente proyecto di cooperacion entre Aruba y Hulanda, cu enfoke riba desaroyo economico, inversion, enseñansa y fortalecemento di relacionnan den Reino.

   Un di e temanan principal tabata continuacion di cooperacion den cuadro di Landspakket. Segun Prome Minister Eman, Aruba tin experencia positivo cu e programa aki y Gobierno ta desea di continua cu e cooperacion. El a expresa su aprecio pa e sosten di Secretario di Estado Van der Burg den e proceso aki. Otro tema importante tabata e futuro di e tereno di e tereno di e ex-refineria, caminda Aruba ta ricibiendo sosten tecnico di Hualda pa entre otro preparacion pa limpiesa di e tereno, acercamento riba e mercado internacional y futuro proceso di destaho publico pa actividadnan economico nobo cu lo por haci den e area aki.

   Durante e reunion a papia tambe tocante oportunidadnan pa atrae inversion di institucionnan y empresanan Hulandes na Aruba. Prome Minister Eman a menciona e presencia di Wageningen University & Research (WUR) na Aruba como un ehempel di e cooperacion aki. Gobierno di Aruba lo continua e combersacionnan aki durante un proximo bishita na Hulanda otro siman.

   Ademas, a trata e posibilidad di cooperacion cu HVC di Hulanda den campo di maneho di desperdicio, como tambe e importancia di varios fondo Europeo pa financia proyecto di desaroyo na Aruba. Di su banda, Secretario di Estado Eric van der Burg a destaca e importancia di fortalece e pensamento di un Reino, caminda e cuater pais ta traha hunto pa crea mas oportunidad y fortalece otro.

   Den e contexto aki, a papia señal riba e proximo Kingdom Summit cu lo tuma luga na St. Maarten na november, caminda e paisnan di Reino lo reuni. Tambe a dedica atencion na e retonan den enseñansa na Aruba y e importancia di cooperacion den e sector aki.

   Ambos mandatario a califica e encuentro como constructivo, cu un enfoke comun riba fortalecemento di cooperacion y desaroyo di oportunidad concreto pa Aruba y e Reino Hulandes.