ImSan hunto cu HOH y DVG desde Maart a start un proyecto pa un miho maneho di Diabetes

Dr. Monica Nuboer a relata:

• Ta duna siguimento na 300 persona diabetico cu cierto caracteristicanan 

ORANJESTAD (AAN)- Den cuadro di Diabetes, dia 1 di Maart di e aña aki, ImSan a cuminza cu un proyecto, conhuntamente cu HOH, y naturalmente ImSan. DVG ta esun cu ta track e proyecto, cual ta cu fondonan di Hulanda, y HOH a envolve un internista den e proyecto y ImSan ta pone e Centro Diabetico. Esaki dr. Monica Nuboer, Coordinador Medico di ImSan a duna di conoce, den entrevista cu DIARIO.

   “E ta un proyecto piloto unda cu ta bay sigui 300 pashent diabetico cu mester tin cierto caracteristica, anto nan ta bay wak si door di e maneho aki e sucu di e pashentnan aki ta wordo miho maneha, anto e ora ey nos ta bay bin cu e resultado pa nos presente na AZV, pa nos wak si nos por haya fondo anto asina nos ta crea un ‘anderhalvelijnszorg’ (atencion di linea y mey of atencion di salud di nivel net meymey entre eerste y tweede nivel), pa yega mas facil na un specialista”, dr. Nuboer a splica.

   El a agrega cu e ora ey e pashent no tin nodi warda asina hopi, pero via e Centro Diabetico bo ta yega ya caba y bo ta bao maneho di specialista.

   Dr. Nuboer a comenta cu un di e dificultadnan cu tin  cu e proyecto ta cu diferente doño di trabao ta haci dificil pa nan trahadornan bin consulta na Centro Diabetico.

   “Esey ta algo cu ta fastioso pasobra cu nos kier pa e ta exitoso pa nos por aplike na henter comunidad, pero nos kier pidi cooperacion; pero di otro banda tin diabetico cu no kier bisa cu e ta diabetico y nan no ta menciona esaki na nan doño di trabao, anto esey ta haci dificil, pasobra nan tin berguenza of pasobra e ta algo priva, no ta algo cu tur hende kier bisa cu e ta diabetico, y desafortunadamente, sobrepeso ta algo cu ta hopi halto aki na Aruba”, dr. Monica Nuboer a relata.