The content originally appeared on:
Diario
Diamars anochi 8:30 pm tin foro na Telearuba
ORANJESTAD (AAN): Comision Trafico Sigur ta contento di anuncia e lansamento di su prome programa di Television hunto cu Telearuba esta Forum, cu e meta pa educa comunidad ariba diferente aspecto di siguridad den trafico. E programa lo worde transmiti Diamars 16 di April 2024, di 8:30 p.m. pa 9:30 p.m., via Telearuba y tambe Live riba Facebook.
E prome programa lo enfoca riba e topico critico di uzo di e asiento pa mucha (Child Car Seat) y su importancia primordial den proteccion di muchanan den trafico. Hopi mayornan no ta tuma esaki mucho na serio, pero durante un accident of incidente, sin importa e gravedad, e muchanan ta sufri e mayor consecuencianan. Den e prome programa lo tin panelistanan experto den diferente ramo y televidentenan por spera informacion amplio di:
(*) Impacto di negligencia di Child Car Seat: E expertonan lo duna un bista riba e consecuencia nan pa un baby of e curpa di un mucha den caso cu e worde envolvi den un accidente mientras cu e no ta firmemente sinta den un Child Car Seat.
(*) Ley di trafico: Lo duna un bista di e leynan existente cu ta diseña pa proteha mucha den auto y e consecuencianan di viola e reglanan aki.
(*) Guia di Uzo Corecto: Pa brinda e mayor, familiar di e mucha conocemento practico, e programa lo ofrece consehonan valioso con pa uza un Child Car Seat den un vehiculo na un manera corecto y efectivo.
Comision Trafico Sigur ta dedica na promove siguridad ariba caminda y proteha nos comunidad, especialmente nos muchanan di accidentenan cu por a worde evita. Pa medio di e programa di TV aki, ta trata di empodera e televidentenan cu e hermentnan necesario pa nan siguridad.
Si bo tin preguntanan of preocupacionnan tocante siguridad di mucha den trafico, nos ta curashabo bo pa manda bo preguntanan durante e programa via WhatsApp na 597-2323. E panelista nan lo trata di contesta tur preguntanan cu worde manda durante di e programa.
Sintoniza TeleAruba diamars 16 di April pa 8:30 pm pa mira e prome programa di television Trafico Sigur via TeleAruba Forum. Hunto, ban haci nos camindanan mas sigur pa un y tur. Salba Bida, Scoge pa Siguridad.
