The content originally appeared on:
Diario
ORANJESTAD (AAN): “Nunca nos mester lubida di unda nos ta bin y tampoco riba esnan cu a maneha nos turismo”
Otmar Oduber a felicita Minister di Turismo pa un reconocemento sumamente na su lugar. Ta trata aki di e reconocemento duna na e directornan anterior di Oficina di Turismo di Aruba.
Pa Otmar, nunca nos mester lubida di unda nos ta bin y den e caso specifico aki, nunca lubida riba esnan cu a maneha y dirigi nos turismo. Michael Kuiperi, Beti Arends, Rory Arends, Remigio Wever, Jan van Nes y Myrna Jansen.
Oduber tabatin e honor di conta cu Michael Kuiperi y Rory Arends den e prome Tourism Council ora el a bira minister di Turismo pa prome biaha na 2009. Tambe nan dos a contribui cu e ley cu a conduci cu ATA a bira un entidad Sui Generis. Otro persona cu Otmar tabatin e honor di traha cune durante varios aña ta Jan van Nes, tambe cu Remigio Wever y finalmente Myrna Jansen, cu kende el a traha no solamente como directora di ATA, pero tambe como su consehero.
Durante Otmar Oduber su carera e tabatin e honor di traha cu 5 di e 6 directonan di ATA y logicamente a menciona tambe Ronella Croes, actual directora, un hoben cu ora a tumen a trabou 13 aña pasa a cuestiona e decision aki debi cu e ta un hende muhe y hoben. “Awe mi ta kere nos tur ta orguyoso di e decision ey cu a wordo tuma”.
Finalisando Otmar a felicita un biaha mas gobierno di Aruba, minister di Turismo y ATA pa e reconocemento aki, cual e ta kere mester tuma lugar mas frecuente den nos comunidad, esta di duna balor y reconocemento na esnan cu a haci un diferencia den e desaroyo di nos pais. El a hasta trece dilanti e idea di crea un espacio na Plaza Turismo pa duna reconocemento na cada un di e directornan di ATA.
