The content originally appeared on:
Diario
Prijs di gasolin ta subi awe cu 10 cen pa liter
ORANJESTAD (AAN): Minister di Asuntonan Economico, Comunicacion y Desaroyo Sostenibel ta anuncia e prijsnan nobo di benta di combustibel entrante 13 maart 2024.
Gasoline unleaded-premium ta subi cu 10,2 cen, pa wordo bendi entrante awe cu 255,6 cen pa liter.
Diesel Low Sulphur ta subi cu 8,6 cen, pa asina wordo bendi awor na 236,4 cen pa liter.
Kerosin ta subi cu 5,7 cen, pa asina wordo bendi awor na 215,8 cen pa liter. E prijsnan ta inclui BBO/BAZV/BAVP.
No ta solamente e islanan den Caribe ta riparando aumento di prijs di combustibel, pero esaki ta wordo sinti tambe e dianan aki na Merca. Siendo cu ultimo lunanan cu a pasa den winter aki, hopi di nan a goza di tarifanan abao di gasolin y diesel.
Pero costonan ta subiendo, y tin indicacion cu e lo sigui subi den henter e region ora cu primavera drenta tambe.
Apenas Diadomingo cu a pasa, varios pais di OPEC a anuncia cu nan ta extende reduccion di produccion di crudo, cu mesora ta dal un presion enorme y ta hisa prijs di crudo y tambe prijs di combustibel.
Prijs di crudo riba Dialuna pa West Texas Intermediate Crude, a habri na $79 pa bari. Esaki ta un aumento di 9% compara cu luna di Februari 2024, y ta na su nivel di mas halto desde November 2023. Trendnan di temporada tambe ta hunga un rol den e caida y subida di prijs di combustibel.
Si bay bek den historia, lo bo descubri cu semper prijs di gasolin ta mas abao den temporada di Winter. Esaki ta debi cu menos hende ta coriendo auto. Pero asina cu sneeuw a smelt y verano a cuminsa, e demanda pa usa mas gasolin ta crece, y prijsnan ta wordo impacta tambe ora cu refinerianan ta cuminsa produci mas di e mezcla di gasolin special pa zomer.
Na Aruba, esaki a bira e di dos luna consecutivo cu prijs di gasolin ta subi.
