The content originally appeared on:
Diario
Criminalnan a perde un muraya tras di cual nan tabata sconde maldad
E berdad amargo di criminalnan por wordo relata directamente
Victimanan cu mas forza pa presenta abuso na Pueblo di Aruba
ORANJESTAD (AAN) E hecho cu e cantidad di caso di abuso sexual cu ta keda presenta y trata den Sala di Corte di Husticia na Aruba, a parce di ta aumenta considerabelmente, segun tur informacion ricibi, tin relacion directo cu e hecho cu portanan a habri pa periodista por ta presente den Sala di Corte.
DIARIO a papia directamente cu informantenan cu ta di acuerdo, cu e cantidad di casonan cu ta wordo presenta na publico, a crece considerablemente.
Ta berdad cu e Pandemia Covid-19 a percura pa mas caso di abuso sexual durante toque de queda.
Sinembargo, Covid-19 a percura pa cantidad di asuntonan cu tabata scondi, a mira luz.
Uno sigur tabate e abuso sexual di personanan cu problemanan pa defende nan mes contra abusador, manera sigur ta e caso di muchanan cu no por dicidi pa nan mes, ni defende nan mes.
Despues di Covid-19 a parce cu ta un pandemia di abuso sexual a rementa, pero informantenan a mustra DIARIO, pero awor e realidad cu tanto bez tabata keda scondi, ta wordo presenta na publico di situacionnan di horor cu tabata tuma lugar.
E negligencia di mucha den casnan di famia, caminda e buskeda di placa ta mas importante cu e proteccion cu e muchanan mester ricibi, sigur ta bini dilanti den situacionnan familiar caminda, hobennan ta bira victima di abuso sexual pa asina adultonan por ricibi un mihor entrada, segun informacionnan cu ta mira luz.
Segun informantenan, mester tene na consideracion tambe, cu den pasado hopi asunto tabata keda scondi, pasobra indirectamente violadornan di ley tabata sconde nan identidad den e forma cu Husticia no tabata permiti presencia di prensa den sala di Corte, loke a haci cu ta informacion cu otro personanan entrega na periodismo, tabata haya publicidad.
Husticia tabata sali for di e punto di bista cu e porta cera di Sala di Corte, tabata percura pa privacidad di e victima. Sinembargo, e portanan cera tabata percura tambe pa informacionnan di e malhechornan y otro realidadnan importante, no haya e atencion cu nan tabata merece.
Periodistanan cu tabata atende casonan den Corte a lanta para y den esaki sigur mester reconoce e labor di periodista cu ta sigui casonan di Corte y a uni pa asina logra cu porta di Sala di Corte di Husticia ta wordo habri pa periodistanan ora tin casonan di abuso sexual.
E presencia di periodistanan na casonan den Corte, a sostene e proceso di democracia pero sigur a haci cu awor publico ta ricibi informacion directo di periodistanan entorno casonan criminal cu ta wordo presenta dilanti Huez.
Mas y mas publico tambe por tuma nota con den casnan di familia tambe mester cuminsa tuma accion contra e oportunidadnan cu ta wordo brinda na abuso sexual y e forma cu hobennan ta wordo uza pa genera placa pa drecha condicionnan sexual di nan familia, pa medio di e aporte di placa cu violadornan di ley ta entrega na miembronan di familia, cu ta haci abuso sexual di menornan productor di placa pa familia.
DIARIO ta sigui traha riba uno di e topiconan cu mas atencion ta ricibi actualmente di Aruba despues cu periodismo a haci posibel pa identidad di malhechornan den casonan di abuso sexual contra menor di edad, bira conoci cu detayenan cu mester haci familianan realiza nan tarea pa proteha muchanan y hobennan di nan famia y no uza nan como entrada pa medio di abuso sexual, manera a keda revela.
