Por tin falta di coincidencia entre e oferta laboral na Aruba y loke un Arubiano ta studia afo

Tisa LaSorte, CEO di AHATA:

* Esey ta parti di e problema di escasez 

ORANJESTAD (AAN)-- Tisa LaSorte, CEO di AHATA, den entrevista cu DIARIO a comenta cu ora tin scarcedad di trahado, di mes e condicionnan pa e trahadornan ta mehora, e dunador di trabao ta cuminza bira creativo y mas atractivo, y e beneficionan pa e trahadonan ta bira miho, y ta duna nan mas bienestar.

   “E dunado di trabao tambe mester siña con pa bira mas competitivo, con por hisa e beneficio cu e ta duna e trahado, p’e bira atractivo y bin traha cerca dje”, LaSorte a menciona. Tur esey ta positivo y ta tumando lugar, salarionan a subi hopi, e beneficionan a cuminza cambia. “Pero esey no ta kita cu mundialmente,  tin un scarcedad di trahado. Esey kiermen cu bo no por kita e problema ey y cu bo mester deal cu ne” segun Tisa Lasorte.

   El a agrega cu si companianan ta sigui habri, si ta sigui duna permiso pa mas hotel habri, ta bay tin mester di mas hende. “Dus, ora bo ta duna permiso bo mester planea p’esey tambe”, Lasorte a señala y a trece acerca cu loke ta pasa ta cu tin un falta di coincidencia (mismatch) entre e trabaonan cu tin na Aruba y loke un Arubiano a studia afo.

   El a señala cu kizas un Arubiano a studia afo un profesion cu kizas ta su pasion, pero cu no tin na Aruba. “Nos mester actualmente na Aruba loke tin escasez p’e pa e trabaonan cu ta wordo ofreci na Aruba”, LaSorte a relata.

   El a indica cu mester corda cu e trabaonan cu e companianan ta ofrece tur ta cu conocimento di gobierno.

   “Gobierno ta duna permiso, nan ta habri anto e ora ey bo sa kico bo economia ta.  Bo mester trahado pa e economia ey. Dus, si bo sa cu bo a duna permiso pa un  hotel traha un hotel, bo sa ki tipo di trabao bo mester, na Aruba y nos no tin suficiente, actualmente”, CEO di AHATA a subraya.