FCVR a organiza dos dia di Seminario ‘Coercive Control’

Director Esther Broeksema a relata:

• Un dirigi na abogadonan y otro na e veld social 

ORANJESTAD (AAN) Señora Esther Broeksema, Director di Fundacion contra Violencia Relacional (FCVR), elabora den entrevista cu Matutino DIARIO, tocante e Seminario cu, Diamars di e siman aki, FCVR a organiza, conhuntamente cu su partner, señora Carolina Lopez Paz, di “Law Firm & Consultancy”, den cuadro di e campaña di concientizacion di e fundacion pa loke ta trata “Coercive Control”.

   Señora Broeksema a splica cu e enfoke tabata riba “coercive control” cu  eigenlijk, e meta pa describi y duna informacion con pa identifica e control coercive y for di ki patronchi di comportacion, manera ta wordo bisa “toxico” entre pareha, promoviendo pa identifica relacionnan sano.

   “Durante di e seminario aki (cu eigenlijk ta un serie di seminario), Diamars nos a dirigi specificamente na abogadonan cu ta trata casonan di famia, y tambe nos tabata tin un seminario pa nos partners cu directamente tin di haber cu e parti huridico, na momento cu parehanan separa for di otro, of ora tin discusion tocante partimento di e tempo cu nan tin cu dedica cu nan yiunan. E parti ey di control entre pareha, atrobe ta bin hopi p’adilanti. Esey tabata hopi importante pa nos tin un seminario specificamente dirigi na e grupo aki: pues, Voogdijraad, Plan di Mayor, Bureau Sostene mi, y personal di FCVR”, señora Broeksema a indica.

   El a agrega cu Diaranzon e seminario tabata dirigi na e grupo mas grandi di e veld social cu sigur ta den e ‘front line’ y cu sigur ta yuda personanan cu ta haya nan mes den e situacion menciona.

   “Un victima hopi biaha  no ta realiza cu e ta un victima, te ora cu e wordo splica y duna ehempel cu e comportacion y e nivel di toxicidad cu tin den un relacion no ta normal. Nos a normaliza hopi comportacion di hende homber y hende muhe; no tin diferencia eynan. Locual si nos sa, y e onderzoek a mustra esey tambe tocante ‘coercive control’ ta cu e control specifico aki cu nos ta papia riba dje ta caminda cu un persona den e pareha ta maneha semper e placa, acceso na servicionan, etc., un persona den e relacion eynan tin e dominio, mester realiza cu e relacion ey no ta uno saludable”, señora Esther Broeksema, director di FCVR a relata.

   DIARIO lo sigui cu e tema tan interesante aki den e siguiente edicion.