Tin hopi negoshi local cu ta duna servicio na ‘Vacation Rentals’

Segun Alex Cybul di Vacation Aruba:

ORANJESTAD (AAN): Segun Director di Vacation Aruba, señor Alex Cybul, Aruba ta top den Caribe den e servicio di Airbnb. El a menciona cu durante e Airbnb summit cu a tuma luga na Mexico, Aruba a wordo menciona como e isla cu e mayor percentahe di ‘superhost’ den region y a ricibi e premio como ‘Host of the Year for Airbnb’ pa managers di propiedadnan cu tin mas di 150 cas.

   Segun señor Cybul, pa e negoshi di Airbnb keda bon y no bay for di man, ta necesario pa tuma algun paso pa segura e stabilidad tanto pa e doñonan, turistanan y Aruba. El a duna algun sugerencia cu mester tene cuenta cu ne.

   Prome, ta necesario pa bin cu un sistema di registracion di tur vacation rentals na Aruba. Di e manera aki ta bira conoci ken ta e doñonan, si e cas ta adecua pa turista y pa e proposito cu nan ta busca un Airbnb. Y tambe si e ta cumpli cu tur rekisito. E sistema di registracion ta colecta tur e informacionnan necesario y di e manera aki ta caba cu tur suposicionnan cu tin encuanto Airbnb.

   Di dos, mester proteha localnan. Cu esaki e ta enfatisa, no solamente mester protehe localnan cu ta doño di cas, pero tambe esnan cu ta maneha e vacation rentals y tur e servicionan rond di esakinan, entre otro decoracion, diseño interior, compania di construccion, pool, hardin, koki, instructor di yoga, fotografo, etc. Esakinan y mas ta bay rond di e industria di vacation rentals cu no ta visibel pa publico. 

   Segun señor Cybul, normalmente hende ta pensa solamente riba doñonan di e cas pero no riba tur e companianan cu a haci trabaonan na e casnan aki y localnan cu a cuminsa nan negoshi door di e industria aki. El a remarca cu Departamento Economico a menciona cu nan a kibra record di e cantidad di compania nobo cu a registra. Segun e, un gran cantidad di e companianan aki ta duna servicio na e lugarnan di huur aki. Cu esaki, e localnan ta haya oportunidad pa duna servicio na turistanan directamente, cual antes no tabata e caso. Ademas, esaki a crea cuponan di trabao.

   “Nos no por cambia pasado. Nos mester cambia pa futuro y e miho dia pa cuminsa ta awe. Mester haci registracion, mester haya informacion, y mester cuminsa pone limitenan. Pasobra nos kier pa e funciona pa tur hende, pero mester cumpli cu cierto rekisitonan y mester percura pa e no bira un ‘free for all’”, señor Cybul a duna di conoce.