Tur via diplomatico interno a wordo agota sin ricibi un contesta for di Ministerio
ORANJESTAD (AAN): Mientras Gobierno di Aruba ta participa activamente den conferencianan internacional riba Salud Mental, Sustainable Development Goals (SDG) y derecho laboral, y mientras e minister concerni regularmente ta enfatisa e importancia di bienestar di trahadonan, dialogo social y un ambiente di trabou digno, un grupo di empleadonan di Directie Arbeid en Onderzoek (DAO) ta denuncia cu e realidad cu nan ta biba internamente ta mustra un cuadro completamente diferente.
Segun e personal, despues cu tur canal interno di comunicacion a keda agota sin resultado, nan a dicidi di haci un yamada publico pa atencion riba lo cu nan ta considera un contradiccion entre e mensahe cu Aruba ta trece na escenario internacional y e condicionnan cu, segun nan, ta wordo impone den nan propio lugar di trabou.
Esaki ta nan reaccion: Trahadonan di Directie Arbeid en Onderzoek (DAO) a drenta den un estado di alerta maximo y a dicidi di uni nan bosnan pa manda un yamada urgente na comunidad. Esaki
den bista cu tur via diplomatico interno a wordo agota sin ricibi un contesta for di Ministerio. Pa
motibo di un temor legitimo pa represalia institucional, e personal ta emiti e comunicado aki,
apelando na e consenshi di un Minister: e leynan y tratadonan internacional t'ey pa wordo aplica,
no pa wordo uza como propaganda politico.
E personal ta trece den discusion argumentonan relevante cu no por wordo nenga:
Gasto di Placa versus Aplicacion Real:
Gobierno di Aruba ta gasta fondonan publico pa manda delegacionnan participa den
conferencianan internacional di ILO, Sustainable Development Goals (SDG) y formacionnan
riba proteccion di Salud Mental. E personal ta puntra: “Con por ta posibel cu ta gasta placa pa
asisti na e conferencianan aki, pero ora ta trata e propio lugar di trabou na Aruba, no ta aplica e
medidanan corecto pa sostene e tratadonan aki? Un compromiso internacional no ta un show; e
mester wordo implementa den practica.”
E deposito di DPL y e Peligro pa Salud Mental: E mudamento pa un deposito ("warehouse")
bieu, converti den oficinanan structuralmente cera y sin bentana, no ta djis un problema di
comodidad—e ta un menasa directo pa e salud mental y fisico. Estudio cientifico mundial di
ARBO ta confirma cu labor humano full-time den un lugar sin luz natural (e “Efecto Bunker”) ni
ventilacion activo ta causa Sick Building Syndrome, claustrofobia, insomnio, ansiedad cronico y
un devaluacion di e dignidad di e trahado.
Problema de Humedad y Schimmel (Mold) Historico: E falta di circulacion di aire fresco for
di afo den e area ey, combina cu un sistema di airco closed-loop cu ta djis recircula e mesun aire
central, ta produci un nivel peligroso di humedad. E edificio di DPL tin un historia conoci di
problemanan serio di schimmel, locual ta un riesgo severo pa complicacionnan respiratorio
grave.
E Paradox di e "Straight Face" cu e Publico: Como trahadonan di Labor, e personal mester
atende cu trahadonan y doñonan di trabou di sector priva cu ta bini cu conflictonan laboral. “Con
nos por para cu un 'straight face' (cara serio) dilanti di e publico y nos clientenan pa defende nan
derechonan, miéntras e propio Gobierno ta trapa riba nos derechonan fundamental? Esaki ta
destrui e credibilidad di e institucion.”
Dialogo versus Dictadura:
Gobierno ta brota y ta promove formalmente e principionan di union, husticia, derecho y un
dialogo habri pa tur ciudadano na Aruba. Pero lamentablemente, te cu awe, e unico realidad cu
nos como trahadonan a drenta aden ta un maneho directivo, top-down y dictatorial for di
Ministerio. Dialogo structural of un intercambio di pensamento real no t'ey; tin unicamente
imposicion unilateral di ordennan y deadlinenan estricto sin ningun bista pa e ehecutabilidad of e
consecuencianan humano.
Derecho Constitucional:
Nos tin e derecho fundamental y constitucional di expresa nos preocupacionnan abiertamente,
pasobra esaki ta toca directamente nos propio seguridad, nos salud, y nos bienestar integral den e
lugar di trabou. Ora e vianan democratico interno wordo cera pa via di un actitud directivo
autocratico, e via publico ta keda nos unico amparo legal pa defende nos integridad como ser
humano.
Ehempel di un “Goed Werkgever”:
E personal ta anticipa y ta rechasa e argumento debil di Ministerio cu Aruba no tin un ley di
ARBO formalmente aproba pa e directiva aki. E falta di un bachi legal structural no ta un excusa
pa un maneho inhusto. Como Gobierno, bo no mester spera riba un ley pa actua rectamente y cu
decencia humano. Si Gobierno mes uza e bachi legal aki pa hinca su trahadonan den un deposito
sin bentana, e ta habri un porta peligroso pa companianan priva haci exactamente igual contra
nan mesun empleadonan den via legal. Gobierno mester goberna cu ehempel, no a base di
imposicion legal solamente.
E personal di DAO no ta pidi un palacio; nos ta pidi unicamente un luga di trabou decente,
saludabel y sigur pa nos por sigui sirbi e comunidad di Aruba dignamente. Nos ta exigi
categoricamente pa e decision di mudamento aki wordo suspendi inmediatamente, te ora cu haya
un luga structuralmente adecua cu a wordo construi formalmente pa wordo uza como espacio di
oficina, y no un deposito adapta.
