‘Regulacion di vacation rentals ta un paso importante pa crea balansa entre desaroyo economico y calidad di bida na Aruba;

Ministro Gerlien Croes:

ORANJESTAD (AAN): Cu aprobacion di un plan di accion pa registracion y regulacion di vacation rentals, Gobierno AVP-Futuro ta tuma un paso importante pa establece mas claridad, structura y responsabilidad den un sector cu a conoce un crecemento significativo durante e ultimo añanan.

  Minister Gerlien Croes, ta expresa su sosten pa e iniciativa aki, destacando cu un desaroyo economico sostenibel mester bay man den man cu proteccion di nos comunidad, bienestar di nos famianan y preservacion di calidad di bida den nos barionan.

   “Aruba ta un pais cu ta sigui desaroya, pero cada paso di progreso mester tene cuenta cu e hendenan cu ta biba aki. Turismo ta un pilar importante di nos economia, pero na mes momento nos tin e responsabilidad pa proteha nos barionan, nos famianan y e oportunidadnan di nos generacionnan venidero. E balansa ey ta fundamental,” Minister Gerlien Croes a expresa.

   E plan di accion, aproba door di Conseho di Ministro, ta contempla un proceso di registracion obligatorio pa acomodacionnan existente cu ta opera como vacation rentals. E registracion lo permiti Gobierno haya un bista mas completo di e sector, identifica e situacion legal di cada acomodacion y determina cua pasonan ta necesario pa establece un regulacion responsabel.

   Minister Gerlien Croes ta considera cu e iniciativa ta representa un manera mas structura pa atende un realidad cu ta afecta diferente aspecto di bida na Aruba, incluyendo desaroyo urbano, disponibilidad di vivienda, actividad economico y convivencia den comunidad.

   “Nos mester crea espacio empresarial y desaroyo economico, pero sin perde di bista e necesidadnan di nos propio pueblo. Un Aruba cu ta crece mester ta un Aruba caminda nos muchanan y hobennan tambe por mira un futuro, forma nan famia y haya oportunidad pa prospera den nan propio pais,” Minister Gerlien Croes a enfatisa.

   Claridad, responsabilidad y participacion di comunidad: Un aspecto importante di e maneho nobo ta cu Gobierno lo evalua e acomodacionnan teniendo cuenta cu nan ubicacion, cantidad di unidadnan, siguridad, accesibilidad, impacto riba e bario y proteccion di naturalesa y patrimonio.

   E plan ta distingui entre diferente categoria di area, cu condicionnan y posibilidadnan di legalisacion cu por varia segun e ubicacion y e situacion existente.

   Pa Minister Gerlien Croes, e enfoke aki ta importante pa garantisa cu desaroyo di e sector ta tuma luga cu responsabilidad y respetando e caracter di nos diferente barionan.

   “Cada bario tin su identidad, su comunidad y su propio necesidadnan. Nos mester sigui stimula progreso, pero un progreso cu ta ordena, responsabel y cu ta contribui positivamente na e ambiente caminda nos hendenan ta biba,” Minister Gerlien Croes a indica.

   E minister ta destaca tambe e importancia di participacion di comunidad den e proceso. Como parti di e siguiente pasonan, Gobierno lo brinda oportunidad na habitantenan, empresarionan y otro partidonan involucra pa haya informacion, participa den reunionnan informativo y presenta nan reaccionnan formal durante e proceduranan di consulta publico.

   Un vision pa un Aruba cu ta crece cu balansa: E regulacion di vacation rentals ta forma parti di e compromiso di Gobierno AVP-Futuro pa fortalece planificacion territorial, stimula desaroyo economico responsabel y mehora calidad di bida di pueblo di Aruba.

   Minister Gerlien Croes ta subraya cu e iniciativa aki mester wordo mira como parti di un vision mas amplio pa futuro di pais Aruba, caminda progreso economico y bienestar social ta complementa otro.

“Ora nos papia di futuro di Aruba, nos ta papia di mucho mas cu inversion y crecemento economico. Nos ta papia di e calidad di bida cu nos kier garantisa pa nos muchanan, e oportunidadnan cu nos kier crea pa nos hobennan y e comunidad cu nos kier preserva pa e siguiente generacion.

   Desaroyo sostenibel ta nifica avansa cu vision, cu responsabilidad y cu respet pa nos pueblo. Esaki ta e Aruba cu nos kier sigui construi hunto,” Minister Gerlien Croes a conclui.