Prome Minister Mike Eman lo destaca con Reino Hulandes por crea mas oportunidad economico pa Aruba

Durante siguiente Kingdom Summit na St. Maarten

ORANJESTAD (AAN): Prome Minister Mike Eman a reuni cu su colega Prome Minister di St. Maarten, Dr. Luc Mercelina, pa intercambia vision tocante futuro di Reino Hulandes y e preparacion pa e proximo Kingdom Summit. Durante e encuentro na Den Haag, e dos prome ministernan a dialoga tocante e cooperacion entre nan paisnan y e oportunidadnan pa duna Reino un contenido nobo, cu por contribui na desaroyo economico y bienestar di su habitantenan.

   Prome Minister Eman a destaca cu Reino Hulandes no mester wordo mira solamente como un herencia di pasado, pero tambe como un instrumento cu por crea oportunidad pa futuro. Segun Eman, ta importante pa e paisnan reflexiona riba e obhetivo di nan cooperacion y identifica e beneficio concreto cu e relacion den Reino por brinda. E prome minister a splica cu Aruba pa hopi tempo ta promove e pensamento aki, particularmente mirando e posibilidadnan cu e posicion strategico di e islanan Caribense ta brinda.

   Mercado regional: Un aspecto importante di e vision di Eman ta e oportunidad cu Aruba tin pa sirbi como un plataforma pa instituto y empresa Hulandes cu ta interesa den e mercado di Caribe y Latino America. Eman a destaca cu Aruba su ubicacion geografico, cerca di un region cu ta creciendo, por brinda un bentaha importante pa e institutonan Hulandes cu ta desea amplia nan actividadnan internacional. Como ehempel, e prome minister a menciona Wageningen University & Research (WUR), un instituto di renombre internacional cu ta explorando e posibilidad di establece un presencia permanente na Aruba.

   E cooperacion aki por brinda Aruba acceso na conocemento, investigacion y experencia internacional. Na mes momento, WUR por beneficia di e oportunidad pa ofrece su servicio y conocemento na otro paisn den region. Eman a explica cu, ademas di su ubicacion geografico, Aruba tin hende cu conoce e idiomanan y e cultura comercial di e region. E conocemento aki por facilita e conexion entre e institutonan y empresanan Hulandes cu e mercadonan den Caribe y Latino America.

   Den e vision di Eman, un cooperacion asina por contribui na un cambio den e manera cu Hulanda ta mira e paisnan Caribense. E islanan no solamente como teritorio cu historicamente ta forma parti di Reino, pero tambe como socio strategico cu por contribui activamente na desaroyo economico.

   E reunion entre Eman y Mercelina a tuma luga den preparacion pa e prome cumbre di Reino cu lo tuma luga dia 17 y 18 di November 2026 na St. Maarten. Durante e encuentro, e gobiernonan di Aruba, Corsou, Hulanda y Sint Maarten lo intercambia vision tocante futuro di Reino y e posibilidadnan pa amplia nan cooperacion.

   Prome Minister Eman a indica cu Aruba ta mira e summit como un oportunidad pa presenta su vision di un Reino cu ta genera mas oportunidad economico pa tur su paisnan. Den e contexto aki, Eman ta considera importante pa e ministerionan y e institutonan Hulandes participa mas activamente den e buskeda di e oportunidadnan nobo, probechando di e posicion strategico cu Aruba y e otro paisnan Caribense tin.

   Pa e prome minister, e cooperacion den Reino mester bay mas leu cu e lasonan historico y contribui na un relacion cu ta brinda beneficio mutuo, inversion, conocemento y oportunidad pa futuro.