‘Parking den Caya Grandi ta mustra algo cu Gobierno ainda no por maneha’

Segun comerciante Marjorie Vermeer:

• Eror ta di comienso cu a uza tur espacio como parking
• Nunca e tres edificionan pa staciona no a bin tampoco 

ORANJESTAD (AAN): Segun comerciante Marjorie Vermeer, haci compras na otro paisnan ta un entretenimento, pa cual Aruba ta purba bende e idea aki pa atrae turismo. Pa nos pais, esaki ta importante pasobra placa ta drenta via turismo. Pa turistanan ta importante pa tin facilidad di parkeer ora nan bishita caya grandi. Mayoria turista ta costumbra cu luganan di parkeo caba na nan pais. “Si bo kier turismo, bo mester bin cu parking”, señora Vermeer a enfatisa. 

   Di un banda, segun Vermeer, kier pa turista sigui drenta Aruba y bishita Caya Grandi pa gasta placa, y di otro banda, no kier pa e Arubiano paga parking. Contrario na Caya Grandi, otro luganan di entretenimento na nos isla no tin parking, entre otro Palm Beach, debi cu tin hopi luga pa parkeer. Na Playa esaki no ta e caso.          

   Segun Vermeer, e fout cu a haci tempo cu a introduci parking, tabata cu a uza tur espacio como parking. Esnan cu mester of kier a bay den caya, mester a paga. Tambe e gobierno e tempo ey, a pone vaknan geel pa trahadornan di gobierno.

   Vermeer a menciona tambe e intencion di a bin cu tres edificio di piso pa parkeer na unda cu ciudadanonan lo a subi den e tram pa bay nan trabao. E edificionnan no a bin, pero e parking si a bin, cu a caba di mata Caya Grandi.

   Segun señora Vermeer, mester bin cu un maneho unda ta laga cierto cayanan cu parkeermeters y e resto pa ciudadanonan parkeer libremente. Di e manera aki ta logra cu e Arubianonan tambe ta bay bek caya.

   “E ta facil. Anos ta wak’e facil pero ta dificil pa papia cu Minister Geoffrey Wever pa splic’e esaki. Actualmente, hopi caminda tin parkingmeters y toch hendenan no ta paga. Ta musta algo cu Gobierno ainda no por maneha”, señora Marjorie Vermeer a remarca.