The content originally appeared on:
Diario
ORANJESTAD (AAN): Y e trabao di tur boluntario, docentenan, alumnonan, mayornan, esnan di Living Soil Aruba, yudansa di Santa Rosa,
a logra cu e di dies scol a caba di ricibi nan propio hardin di fruta y berdura, den cuadro di e proyecto di Agroforesteria.
E biaha aki, riba Diasabra 8 di Juni, cu Pius X School na Dakota a ricibi esaki, caminda Diasabra di mainta trempan caba hendenan a yega cu nan material, herment, y handschoen pa asina yuda prepara e tereno.
A compronde cu varios alumno di Klas 6 tambe a presenta riba nan dia liber, pa asina yuda crea, mira, y siña con ta prepara tera, planta mata y simia, y bay cuida nan propio hardin.
DIARIO a compronde cu e biaha aki, di un forma of otro hasta un pareha turista procedente di Merca cu ta bishitando Aruba, a mira riba Social Media cu tin e proyecto di agroforesteria na e scol, y a dicidi pa busca forma pa yega na e scol. Nan a usa GoogleMaps pa haya sa con pa yega na Pius X School, y a logra yega tambe. Nan a para nan auto, baha, y a raporta nan mes, cu na ta cla pa traha como boluntario, pa asina duna un man. Di e forma ey nan ta duna bek na comunidad, e danki cu pueblo a bin ta ofrece nan di ta asina hopi hospitalario.
Tanto cabezante y docentenan di Pius X School a keda sumamente contento cu esey, y a gradici nan inmensamente pa e yudansa.
Nan a pone petchi y sombre riba cabez, y a cuminsa yuda. Riba e potret por mira nan ta para dilanti e edificio di Pius X School.