The content originally appeared on:
Diario
ORANJESTAD (AAN): Secretario di estado Alexandra van Huffelen di Relacionnan den Reino y Digitalisacion ta bishita Aruba, Bonaire, Saba, St. Eustatius y St. Maarten di 26 te cu 31 di mei.
Segun espectativa esaki ta su ultimo bishita di trabao na e islanan. E bishita ta den cuadro di e Consulta di Gobernadornan na Aruba, ceramento di un acuerdo administrativo na Bonaire y apertura oficial di un proyecto di construccion di vivienda social na Saba.
Consulta di Gobernadornan na Aruba: Na Aruba e secretario di estado ta participa na e consulta cu e tres gobernadornan di Aruba, Curaçao y Sint Maarten. Esaki ta un consulta regular, periodico, cu ta formalmente inclui den e Reglamento di Gobernadornan.
Na Aruba e secretario di estado ta bishita Universidad di Aruba, unda e lo haya un recorido den e edificio di Maria Convent recientemente renoba, riba campus di e Universidad. Cu un contribucion di mas di 7 miyon euro di Union Europeo a transforma e edificio aki den un facilidad di enseñansa moderno. Durante su estadia na Aruba e secretario di estado tin un encuentro cu e comunidad ‘queer’ riba e isla y lo cera conoci cu e Procurador General nobo di Aruba.
Bonaire, Saba y Sint Eustatius: Riba 28 di mei e secretario di estado ta firma e acuerdo administrativo nobo cu Bonaire. Un par di componente cu ta resalta ta e programa ‘Traha riba Bienestar y Prosperidad’, e impulso extra na proteccion y desaroyo di Papiamentu, e enfoke riba crecemento y desaroyo economico manehabel y e ambicion pa logra un acuerdo regional (Regiodeal) pa Bonaire. Na Bonaire e secretario di estado lo combersa cu habitantenan tocante biba cu un limitacion riba e isla.
Na Sint Eustatius y Saba e secretario di estado ta combersa cu e colegionan ehecutivo di e islanan tocante progreso y implementacion di e acuerdonan administrativo di 2023. Na Sint Eustatius e secretario di estado lo bishita diferente luga cu ta parti di e ‘regiodeal’. Ta probecha di e bishita pa papia cu esnan envolvi tocante progreso y solucion di e problematica di cabrito riba e isla.
E bishita na e islanan ta den cuadro tambe di e progreso den realisacion di construccion di vivienda pagabel y planificacion di tereno riba e islanan. Riba 30 di mei e secretario di estado ta haci apertura na Saba di e proyekto di construccion di vivienda ‘Under the Hill 2’. Tambe e secretario di estado ta bishita un futuro sitio di construccion pa construccion di vivienda pagabel.
Na St. Maarten: E bishita ta termina 31 di mei na Sint Maarten unda ta tuma luga un encuentro cu miembronan di e gabinete, entretanto demisionario, di Sint Maarten.
