Si Gobierno kier prohibi completamente uzo di steps y bais electrico mester establece esaki den ley

Director di Departamento di Aduana, Roderick Croes

ORANJESTAD (AAN): Director di Departamento di Aduana, señor Roderick Croes, a declara durante un entrevista recien cu DIARIO, cu mientras steps y bais electrico no ta regla den ley y no tin un prohibicion oficial di importacion, Aduana no tin base legal pa impedi pa nan drenta Aruba.

Señor Croes a splica cu e vehiculonan aki no ta apto ni permiti pa circula riba caminda publico. Sinembargo, nan por wordo uza riba tereno priva, manera den cura di cas, caminda autoridadnan no por prohibi nan uzo.

“Cu no ta permiti pa core cu steps riba caminda publico, no kiermen automaticamente cu nan importacion ta prohibi,” señor Croes a enfatisa.

Segun e director, si Gobierno kier prohibi completamente e uzo di steps y bais electrico, incluso riba tereno priva, lo ta necesario pa establece esaki den ley. E legislacion mester inclui tambe un prohibicion di importacion.

Señor Croes a remarca cu esaki ta un decision cu Gobierno mester tuma. Departamento di Aduana por brinda conseho tecnico tocante e miho manera pa implementa un prohibicion, pero na final ta Gobierno mester presenta e proposicion y Parlamento mester aproba e ley corespondiente.

Na momento cu e ley wordo aproba, e prohibicion mester wordo publica oficialmente den Landscourant. Gobierno lo mester tambe informa publico, pa asina ciudadanonan y importadornan ta na altura cu ya no ta permiti pa importa steps of baisnan electrico.