Na cede di MEP a hisa e bandera mas grandi di Aruba

The content originally appeared on: Diario

E tradicion a sigui

ORANJESTAD (AAN): Un publico grandi tabata presente na Cede di MEP diadomingo anochi pa presencia e bandera di Aruba di mas grandi di Aruba worde hisa.

   Lider di MEP Evelyn Wever-Croes y candidatonan di Partido, bou ambiente di brassband a cana cu e bandera direccion pa e plein unda cu ya tabata tin hopi hende presente ta warda. E bandera di Aruba aki ta uno nobo y ta pa prome biaha ta worde hisa despues cu esun biew a gasta door di tanto aña cu el a worde uza riba e anochi di 17 di maart pa habri nos dia nacional.

   Lider di MEP, prome cu e bandera a worde hisa, a duna un discurso gradiciendo tur esnan presente na e momento hopi special aki pa Partido MEP. Como tradicion, tur 17 di maart pa mei anochi, Partido MEP ta reuni na Cede di MEP pa hisa e bandera y asina habri nos Dia Nacional honrando nos Himno y nos Bandera. E bandera di Aruba, a waya den tur su gloria desde e anochi aki y henter dia di Dia di Himno y Bandera.

   Lider di MEP a emociona bisando cu e biaha aki ta hopi particular pa Partido MEP pasobra esaki ta e prome biaha cu Partido MEP ta hisa e bandera sin presencia di nos baluarte señor Harry Croes, kende cu vision y determinacion, a cuminsa cu e tradicion bunita aki hunto cu señor Rudy Croes, ambos den feliz memoria. Lider di MEP, den nomber di Partido MEP, a confirma e compromiso di Partido pa continua cu e tradicion aki.

  Pa Partido MEP, nos dia nacional ta un dia hopi importante. Pasobra ta danki na e sacrificio di nos pueblo, bou di liderazgo di señor Gilberto François ‘Betico’ Croes (dfm) Aruba a logra su himno y su bandera. Ora cu Betico Croes a drenta den politica na fin di añanan 60, despues di a bolbe for di Hulanda, el a realisa cu den e pueblo di Aruba tabata tin un anhelo pa libertad. Un anhelo cu ya den añanan 40 a existi den nos pueblo, cu lidernan den e tempo ey a purba realisa. Sinembargo, despues di un accion di firm aña aña 1948, e firmanan a worde manda Hulanda, y nada mas a pasa for di ey. E lucha y energia di e pueblo a worde poni den un lachi.

  Despues cu Betico Croes a drenta politica, el a realisa cu ainda e pueblo di Aruba tabata desea su libertad mas fuerte ainda. Y hunto cu hopi ciudadano, Betico a lucha cu sodo, sanger, lagrima, sufrimento y sacrificio, pero cu determinacion, Betico a logra.

  Haciendo un comparacion, Lider di MEP a expresa, cu ora cu Betico a topa cu e lucha, tabata manera un fundeshi di un cas bandona pa hopi tempo, yen di kraak y yerba. Y Betico a dicidi di fortifica e fundeshi aki, hisa e murayanan, pone un dak riba dje, y ora e yabi di liberdad, e yabi di Aruba como pais tabata den su man, e mes no por a probecha di dje. Betico a haya un accidente y despues fayece sin mira su logro bira realidad. “Sinembargo, Betico a entrega nos e yabi. Pa nos biba den e cas aki, cu yama Aruba, den e libertad hunto cu nos yiunan y nan yiunan. Y ta esaki nos ta celebra awe. E libertad di nos pueblo y su simbolonan di identidad y libertad, nos Himno y nos Bandera”, Lider di MEP a expresa.

  Mientras ainda Lider di MEP tabata bisando su palabranan final, e bandera di Aruba a cuminsa bay halto, y momento cu esaki a yega na top, esnan presente a cuminsa canta nos Himno Aruba Dushi Tera. Lider di MEP den nomber di Partido MEP ta gradici tur cu a asisti na e evento bunita aki.