The content originally appeared on:
Diario
Lider di Plataforma Nos Pais, ta denuncia:
*E no ta funciona y ta contra derecho humano
ORANJESTAD (AAN) Den su encuentro cu prensa, na Parkietenbos riba Diamars marduga, ex-Ministro Otmar Oduber a subraya cu tur hende sa cu dump a opera pa mas cu 40 pa 60 aña. Tambe tur hende sa cu gobierno tabata dehado pa percura pa un hindervergunning pa por opera. Esaki relaciona cu e intencion di gobierno di bay back na kima slosh y otro desperdicionan den e sistema di “open air burning”.
“Sinembargo, na e momentonan aki loke mi kier denuncia awo, ta e intencion cu tin di DOW, Gobierno y e Minister, particularmente, di Medio Ambiente, di bay back na un sistema di ‘open air burning’ cu no a funciona y esey a worde constata den rapportnan di DOW.
E politico ta reta DOW, den e caso aki, pasobra e ta haya cu no ta posible cu cinco aña pasa nan a traha un rapport unda a demostra e hecho cu el a descalifica e sistema di kima slosh (awa di riool cu ta awa di wc di henter Aruba) y desperdicio humano cu ta worde hiba na RWZI, cu no ta funcionando tampoco na Parkietenbos, y ta worde kima na un forma cu henter e huma ta bay ta den aire den Parkietenbos y na unda cu e minister dicidi cu ta bay cu ne. “Mi tin entendi cu pasobra tin critica na Parkietenbos e tin intencion di hibe na San Nicolas, e ora ey, unda cu ta bay crea e mesun problema antihigienico y di holo stinki.
Den su rapport DOW a destaca cu nan tabata pagando mas di 1.7 miyon Florin pa aña, na e sistema aki di ‘open air burning’ cu no a funciona y cu a pare e tempo ey, pasobra e tabata unicamente kima e casca di slosh cu ta worde hinca hunto cu paletnan unda cu e slosh tabata sali 90% sin worde kima y tabata worde mezcla cu e sushi cu tin riba dump, dera den dje y pesey nos tabata tin cantidad di musca tur tempo. A para e proceso aki 5 aña pasa y aworaki DOW, cu aprobacion di Minister di Medio Ambiente, tin intencion di bay paga atrobe mas di 1.2 miyon Florin pa bay back na un sistema cu no ta funciona, y cu ta contra e derecho humano, manera a worde treci dilanti door di e Comision di Parkietenbos”, Otmar Oduber, lider di Plataforma Nos Pais, a declara.
