Medidanan preventivo por contribui na reduci e riesgo di inundacion y daño na propiedad

Segun Jair Tromp di Brandweer:

ORANJESTAD (AAN): E yobidanan torencial di siman pasa a causa inundacionnan na diferente parti di Aruba. Den un entrevista cu DIARIO, Comandante di Dienst Brandweer Aruba, Jair Tromp, a splica cu e intensidad di e yobida a tuma e cuerpo di sorpresa. Conforme e reportenan tabata drenta, a mobilisa e mayor cantidad di personal posibel pa brinda asistencia na e lugarnan afecta, una bes cu e yobida a stop.

   Tromp a indica cu e posibilidadnan di Brandweer pa saca awa ta limita den cierto situacion. E pompnan cu e cuerpo tin ta adecua pa saca awa solamente ora e nivel ta supera 30 centimeter. Ora e nivel ta mas abou, e ekiponan aki no por funciona debidamente.

   Den e contexto aki, el a enfatisa e importancia di tuma medidanan di precaucion pa reduci e riesgo di awa drenta cas. Esaki ta cuminsa cu tene cuenta cu e ubicacion y manera di construccion di un cas. Tambe el a conseha pa ciudadanonan considera di tin un of dos pomp chikito disponibel pa saca awa for di cura of cas, den situacionnan caminda e pompnan di Brandweer no ta adecua.

   Hunto cu DOW, Brandweer a trata pa baha e nivel di awa na e zonanan cu tabatin mester di asistencia, entre otro Pos Chikito y Savaneta, dos di e barionan mas afecta. Tromp a informa tambe cu ta spera un pomp mas grandi na December pa amplia e capacidad di saca awa.

   Segun e comandante, tin bon comunicacion y coordinacion entre Brandweer y e departamentonan concerni, entre nan DOW, KPA y CMO. El a subraya cu prevencion, mantencion y un infrastructura na bon estado ta esencial pa limita e impacto di yobida fuerte. Ora ta construi tambe, mester evalua e consecuencianan pa e barionan rond.

   Tromp a señala cu calentamento global y cambionan den patronchinan di tempo ta hunga un rol den e reto aki. Segun e, yobidanan intenso y concentra, manera esun di diadomingo ultimo, ta dificil pa anticipa y atende completamente. Aunque un bon infrastructura y preparacion ta yuda reduci e impacto, nan no ta elimina tur riesgo. P’esey, ta necesario pa sigui tuma medidanan pa mitiga e risiconan y fortalece e capacidad pa mitiga e situacion.

   Finalmente, Tromp a haci un yamada na comunidad pa mantene curanan y gulidornan limpi, pa awa por circula sin obstruccion. E medidanan preventivo aki por contribui na reduci e riesgo di inundacion y daño na propiedad.