Investigacion ta alerta riba impacto di contaminacion di luz riba turtuganan marino na Aruba

*Luz artificial na costa ta desorienta turtuga y crianan

*Expertonan ta pidi accion mas firme pa proteha e especienan 

ORANJESTAD (AAN):  Contaminacion di luz na costa di Aruba ta sigui representa un peliger serio pa turtuganan marino cu ta bin traha neishi na e beachnan di Aruba. Esaki ta sali na cla den un reportahe investigativo di colega periodista Yorleny Oduber Quesada, publica door di Centro di Periodismo Investigativo (CPI) di Puerto Rico, cu a analisa e efecto di luz artificial, desaroyo costero y actividad humano riba e supervivencia di diferente especie di turtuga marino.

Segun e investigacion, luz proveniente di hotel, cas, caminda y otro infrastructura na costa ta desorienta turtuganan embra cu ta busca luga pa pone webo, como e crianan cu ta sali for di e neishi y mester sigui e refleho natural di shelo riba lama pa haya nan rumbo. Ora e proceso natural aki wordo interumpi, hopi cria no ta logra yega lama.

Richard van der Wal, representante di Fundacion Turtugaruba, a señala cu e situacion a disminui durante e ultimo añanan. Segun datonan, na 2008 tabata tin 72 neishi di driekiel registra na costa oost, mientras cu e cifran a baha na 27 neishi na 2024, 19 na 2025. Den un actualisacion, e siman aki Fundacion Turtugaruba a indica cu pa loke ta 2026 e cantidad di neishi ta yegando na casi 20, den luna di juni.

Van der Wal ta atribui gran parti di e descenso aki na e aumento di iluminacion artificial na costa. El a adverti cu cada luz adicional visibel for di e beach ta aumenta e riesgo cu e proceso reproductivo di turtuganan lo fracasa.

Ecologo marino Oriana Wouters a indica cu e problema no ta solamente contaminacion luminico. Segun Wouters, e reto principal ta acumulativo: cada bes cu tin menos beach disponibel, mas muraya, mas construccion y mas actividad humano, e posibilidad pa turtuganan traha neishi ta bira mas chikito. Wouters ta considera preocupante cu Aruba ainda no tin regulacionnan specifico pa controla iluminacion durante temporada di neishi.

Director di Departamento di Naturalesa y Medio Ambiente (DNM), Gisbert Boekhoudt, tambe a confirma cu hopi beach ya no ta ofrece e condicionnan minimo cu turtuganan mester. Segun Boekhoudt, e transformacion físico di e litoral ta formando un obstaculo adicional pa e especienan. Boekhoudt a indica cu DNM ta forma parti di un grupo interdepartamental cu ta traha riba un maneho costero pa Aruba, cu eventualmente por sirbi di base pa regulacionnan mas stricto den futuro.

E articulo aki ta reconoce cu diferente iniciativa local, manera esun di N.V. Elmar, incluyendo uzo di iluminacion “turtle-friendly”, reduccion di luz na cierto area y proteccion di neishi, a produci resultado positivo. Sinembargo, diferente experto consulta ta coincidi cu falta un marco legal obligatorio cu por garantisa proteccion efectivo y permanente pa e turtuganan marino.

Segun e investigacion, Aruba tin e reto di logra un balans entre turismo, desaroyo economico y conservacion di naturalesa. Sin medidanan mas firme, e futuro di ponemento di neishi di turtuganan marino riba e isla por sigui bou di presion.

Por lesa e articulo completo riba e website: periodismoinvestigativo.com. 

- Fuente: Quesada Castillo, Yorleny. En Aruba, proteger la anidación de tortugas exige más que luces amigables (version na Spaño). Centro de Periodismo Investigativo (CPI), 28 di mei 2026.

Potret: CPI / Turtugaruba