Tin video mustrando cu ta e victima mes tabata manehando e UTV

Caso di turista Hulandes cu a fayece...

ORANJESTAD (AAN): Riba Diahuebs atardi, Ministerio Publico di Aruba a emiti un update mas di e caso fatal cu a socede luna pasa riba Diadomingo 13 di September na costa pariba di Aruba, poco pariba di Prizon di KIA.

   E Diadomingo ey pa exactamente pa 2:58 pm, cu diferente yamada a drenta na Centro di Alarma pa raporta un accident pisa.  Na su turno, Centro di Alarma a core notifica Central di Polis pa un accident riba e caminda di Grapefield na San Nicolas.

   E prome unidad di Polis di San Nicolas cu a yega, a topa cu un vehiculo UTV cu a accidenta, y un di e personanan, un dama hoben kende tabata e chauffeur, tabata mustra hopi grave, y pesey a core pidi pa Ambulans yega cu maximo urgencia.

   Dokter Forensico di Polis a presenta y ta constata morto di e dama hoben Kimberly van Ardenne, naci dia 1 di November 2002 na Hulanda, pues e tin 23 aña di edad.

   Mes ora despues di e accidente a start cu un investigacion pa asina determina kico precies a pasa.  Na comienzo, e investigacion tabata den man di Cuerpo Policial di Aruba (KPA), pa despues pasa pa Marechaussee (KMar). Keto bay e investigacion ta andando bao guia di Ministerio Publico di Aruba.

   Den e periodo despues di incidente, a surgi hopi pregunta den media y tambe di parti di famia di e fayecido, tocante “kende tabata stuur e UTV” na momento di e accident.  A sugeri cu e muhe hoben imposibelmente lo por tabata e chauffeur.

   Sin embargo, for di e resultadonan di investigacion disponibel te awor, incluyendo grabacion di video, a sali na cla cu ta e victima mes tabata stuur e UTV.

   Segun Ministerio Publico, e investigacion no ta termina ainda. Actualmente tin investigacion tecnico andando.

   Considerando e atencion di comunidad pa e asunto aki, Ministerio Publico ta haya cu ta importante pa comparti e informacion tocante e chauffeur alvast cu tur hende pa asina brinda claridad tocante e aspecto aki. Por lo demas, Ministerio Publico lo no bisa nada mas te cu e investigacion keda full finaliza.